ව්‍යාජ ලෙස නිෂ්පාදනය කළ හිසකෙස් වර්ණක බෙදාහැරි අයට වැඩ වරදී!

පාරිභෝගික කටයුතු පිළිබද අධිකාරිය විසින් ඉකුත් අප්‍රේල් මාසයේ සිදුකළ විමර්ශනයකදී නීතියේ රැහැනට හසුකරගත් ව්‍යාජ ලෙස නිෂ්පාදිත හිසකෙස් වර්ණක ග්‍රෑම් 10 බැගින් වන ඇසුරුම් ගබඩාකිරීම හා බෙදාහැරීම සිදුකළ වැල්ලම්පිටිය ප්‍රදේශයේ ව්‍යාපාරිකයන් දෙදෙනෙකුට එරෙහිව ඊයේ (03) මාලිගාකන්ද ප්‍රධාන මහේස්ත්‍රාත් අධිකරණයේදී නඩු පවරා ඇති බව වාර්තා වේ.

මෙහිදී එම භාණ්ඩ අලෙවිය සඳහා ගබඩා කරන ලද පිටකොටුව ප්‍රදේශයේ වෙළෙඳසැලකටද නඩු පවරා ඇත.

මේ අතර එම ව්‍යාජ නිෂ්පාදන අලෙවිය සඳහා ගබඩාකිරීම සිදුකරන ලද වැල්ලම්පිටිය පදිංචි පුද්ගලයා සහ බෙදාහැරීම සිදුකරන ලද කොළඹ 14 පදිංචි පුද්ගලයා සිය වරද පිළිගැනීමෙන් පසුව චෝදනා 4ක් සඳහා රුපියල් 7,500 බැගින් රුපියල් 30,000ක දඩ මුදලක් අධිකරණය මගින් නියම කර ඇත.

තවද අදාළ නිෂ්පාදන විකිණීම සඳහා බෙදාහැරීම සිදුකරන ලද කොළඹ 14 පදිංචි පුද්ගලයාට ඉහත දඩ මුදලට අමතරව බරපතළ වැඩසහිතව මාස 6ක සිර දඬුවම් නියමකළ අධිකරණය, එම සිරදඬුවම වසර 5කට අත්හිටුවා තිබේ.

එමෙන්ම අදාළ භාණ්ඩ අලෙවිය සදහා ගබඩාකරන ලද කොළඹ 12 පිහිටි අදාළ ආයතනයද එම වරද පිළිගැනීමෙන් පසු රුපියල් 7,500ක දඩ මුදලක් අධිකරණය විසින් නියම කර තිබේ.

මෙම හිසකෙස් වර්ණක වෙළෙඳනාමය සඳහා නීතිමය අයිතිය ඇති ආයතනය විසින් ග්‍රෑම් 21 බැගින් වන ඇසුරුම් ලෙස තම නිෂ්පාදන වෙළෙඳපොළට නිකුත් කරනු ලබයි..

එහෙයින් තරග විරෝධී ලෙස සහ පාරිභෝගිකයා නොමග යවමින් සත්‍ය නිෂ්පාදකයාගේ තොරතුරුද සහිතව ව්‍යාජ නිෂ්පාදකයා විසින් වෙළදපොලට නිකුත්කර තිබෙන ග්‍රෑම් 10 බැගින් වන ඇසුරුම් වෙළෙඳපොළේ අලෙවි කිරීමට තිබේ නම්, ඒවා ඉවත්කරගන්නා ලෙස ව්‍යාපාරිකයන් දැනුම්වත් කර තිබේ.

එමෙන්ම එවැනි ව්‍යාජ නිෂ්පාදන මිලදීගැනීමෙන් වළකින ලෙසද පාරිභෝගිකයන් දැනුම්වත් කර ඇති අතර තවදුරටත් එවැනි ව්‍යාජ නිෂ්පාදන අලෙවිකරණ වෙළදුන්ට එරෙහිව නීතිය තදින්ම ක්‍රියාත්මක කිරීමටද නිලධාරීන්ට උපදෙස් ලබා දී ඇත.