සිංහරාජ රක්ෂිත​යේ පාරට එරෙහි පෙත්ස​ම් විභාගයට අභියාචනාධිකරණයෙන් තීන්දුවක්!

අධි සංරක්ෂිත ප්‍රදේශයක් ලෙස නම්කර ඇති සිංහරාජ වනාන්තරය හරහා දිවෙන අඩි අටක මාර්ගය අඩි 15 පළලකින් යුත් මාර්ගයක් බවට සංවර්ධනය කිරීමට හිටපු ජනාධිපති ගෝඨාභය රාජපක්ෂ පාලන සමයේදී ඔහුගේ පෞද්ගලික මැදිහත්වීමෙන් ගත් පියවර අභියෝගයට ලක්කරමින් පරිසර යුක්ති කේන්ද්‍රය හා පරිසරවේදීන් ගොනුකර තිබූ පෙත්සම විභාගයට ගැනීමට අභියාචනාධිකරණය ඊයේ (ජූනි 20) තීරණය කර ඇත.

දේශපාලනඥයන්ට හා දේශපාලන හිතවතුන්ට අයත් යැයි කියන සංචාරක හෝටල් සහ සංචාර නිකේතන කරා යෑමට ගමන් පහසුව සැලසීමේ අරමුණින් සිංහරාජය හරහා දිවෙන පටු මාර්ගය නෙළුව සිට දෙණියාය දක්වා පුළුල් කිරීමට පියවර ගෙන ඇති බවත් එකී ක්‍රියාකලාපය නිසා දෙපස පිහිටි වසර සිය ගණනක් පැරැණි ඉතා වටිනා ගස් විශාල ප්‍රමාණයක් විනාශ වීමක් පමණක් නොව දැඩි පාරිසරික හානියක් සිදුවන බවත් පෙන්වා දෙමින් පෙත්සම්කරුවන් වෙනුවෙන් පෙනී සිටි ජ්‍යෙෂ්ඨ නීතිඥ රවින්ද්‍රනාත් දාබරේ කළ කරුණු දැක්වීම සලකා බැලූ අභියාචනාධිකරණ විනිසුරු ගිහාන් කුලතුංග වගඋත්තරකරුවන්ට නොතීසි නිකුත් කිරීමට ද නියෝග කළේ ය.

එම පෙත්සමේ වගඋත්තරකරුවන් ලෙස වන සංරක්ෂණ අධ්‍යක්ෂ ජනරාල්වරයා, මධ්‍යම පරිසර අධිකාරීය, එහි අධ්‍යක්ෂ ජනරාල්වරයා, වන සත්ත්ව හා වන සංරක්ෂණ අමාත්‍යවරයා ලෙස කටයුතු කළ ඩී. බී. රත්නායක, පරිසර අමාත්‍යවරයා ලෙස කටයුතු කළ මහින්ද අමරවීර, මාර්ග සංවර්ධන අමාත්‍යවරයා ලෙස කටයුතු කළ චමල් රාජපක්ෂ හා නීතිපතිවරයා නම්කොට තිබිණි.

නීතිඥ නිම්මි සංජීවනී මගින් 2021 වසරේදී මාර්තු මස පරිසර යුක්ති කේන්ද්‍රය හා එහි විධායක අධ්‍යක්ෂ හේමන්ත විතානගේ එම පෙත්සම ගොනුකර තිබිණි.

හිටපු ජනාධිපති ගෝඨාභය රාජපක්ෂගේ පෞද්ගලික මැදිහත්වීමෙන් එකී මාර්ගය බැකෝ යන්ත්‍ර වැනි යාන්ත්‍රික උපකරණ භාවිත කිරීමට 2020 අගෝස්තු මස ගත් පියවර ජාන හා ජෛවය සංරක්ෂණයට දැඩි හානියක් සිදුකරන ක්‍රියාවක් බවක් එය පුළුල් කිරීම සඳහා කිසිදු රාජ්‍ය ආයතනයකට අවසර ලබා දීමේ හැකියාවක් නොමැති බැවින් ඒ සම්බන්ධයෙන් පුළුල් විමර්ශනයක් සිදුකරන ලෙසත් පෙත්සම්කාර පාර්ශ්වය එමගින් ඉල්ලා සිටියි.

ජ්‍යෙෂ්ඨ රජයේ අධිනීතිඥ නයෝමි කහවිට, නීතිපතිවරයා ප්‍රමුඛ වගඋත්තරකරුවන් වෙනුවෙන් පෙනී සිටි අතර නීතිඥ සමන්ති පොන්නම්පෙරුම හා චානක ජයසිංහ හා නීතිඥ මණ්ඩලය සමග ජ්‍යෙෂ්ඨ නීතිඥ ආචාර්ය රවින්ද්‍රනාත් දාබරේ පෙත්සම්කාර පාර්ශ්වය වෙනුවෙන් පෙනී හිටියේය.