මාලිමාවේ පාර්ලිමේන්තු මන්ත්‍රීට නින්ද ගිහින් මෝටර් රථය අධිබලැති විදුලි කණුවක ගැටෙයි!

ජාතික ජන බලවේගයේ කෑගල්ල දිස්ත්‍රික් පාර්ලිමේන්තු මන්ත්‍රී නන්ද බණ්ඩාර පැදවු මෝටර් රථය හෙනගම නගරයේ දී අධිබලැති විදුලි කණුවක ගැටී අනතුරක් සිදුව ඇති බව වාර්තා වේ

අනතුර ඊයේ (26) රාත්‍රී 11.30ට පමණ සිදුව ඇති අතර අනතුරින් තුවාල ලැබූ ඒ ඔහු මාවනැල්ල රෝහලට ඇතුළත් කර ඇත.

කෙසේ වෙතත් අනතුරින් පසුව හෙම්මාතගම නගරයට මෙන්ම අවට ප්‍රදේශ කිහිපයකට විදුලිය විසන්ධි වී ඇති අතර, විදුලි පාරිභෝගික මධ්‍යස්ථානයේ නිලධාරීන් පැමිණ මාර්ගයට වැටී තිබූ විදුලි රැහැන් ආරක්ෂිතව ඉවත් කර විදුලිය ලබා දී තිබේ.

අනතුරින් නන්ද බණ්ඩාරගේ ජීවිතය බේරී ඇත්තේ එයාර් බැලුම් විවෘත වීමෙන් බවයි තොරතුරු වාර්තා වන්නේ.

රෝහල්ගත වී සිටින පාර්ලිමේන්තු මන්ත්‍රී නන්ද බණ්ඩාර අනතුර සම්බන්ධයෙන් මෙසේ අදහස් දැක්වීය.

“දින හතරක් පමණ එක දිගට පක්ෂයේ සහ ජනතාවගේ විවිධ කටයුතු වෙනුවෙන් මහන්සි වී වැඩ කිරීමට සිදුවුණා. මාගේ පක්ෂ කාර්යාලය අරණායක තියෙන්නේ. සාමාන්‍යයෙන් එහි වැඩ ඉවර කරලා මම නිවසට එනකොට මධ්‍යම රාත්‍රීය වෙනවා. රියදුරා අරණායක ප්‍රදේශයේ කෙනෙක් නිසා මම ඔහු එක්කරගෙන එන්නේ නැහැ. කිලෝමිටර් 8ක පමණ දුර හැමදාම පදවාගෙන නිවසට එන්නේ මම තනිවම.

මේ අනතුර වුනේ නින්ද ගිහින්. හැපෙනකොට තමයි දන්නේ අනතුරක් වුනා කියලා. නමුත් ඒ වන විට මම පැමිණියේ ඊට වඩා අපහසු මාර්ගයක. නිවස පෙනි පෙනී තමයි මේ අනතුර සිදුවුණේ.

පොලීසියත් ආවා විදුලි බල මණ්ඩලයේ වගකිව යුතු නිලධාරීන් ආවා. හානි වූ විදුලි කණුවට ගෙවන්න ඇස්තමේන්තු සකස් කරලා දෙන්න කිව්වා. එතෙන ගැටලුවක් නැති නිසා වාහනය පටවාගෙන ගරාජ් එකට අරන් ගියා.”