මානව හිමිකම් මහ කොමසාරිස් ආවේ එල්.ටී.ටී.ඊ. හිතවාදීන්ගේ වුවමනාවන්ට : විමල් වීරවංශගෙන් චෝදනා!

එක්සත් ජාතීන්ගේ මානව හිමිකම් පිළිබඳ මහ කොමසාරිස් වෝල්කර් ටර්ක් මෙරට සංචාරයක නිරතවූයේ එල්.ටී.ටී.ඊ. හිතවාදීන්ගේ අවශ්‍යතාවට අනුව සකස් කරන මානව හිමිකම් පිළිබඳ වාර්තාවක් ඉදිරියේදී පවත්වන ජිනීවා මානව හිමිකම් කොමිසමට ඉදිරීපත් කිරීමට බව ජාතික නිදහස් පෙරමුණේ නායක විමල් වීරවංශ චෝදනා කරයි.

ආණ්ඩු පක්ෂය හෝ විපක්ෂයට මේ පිළිබඳව වගේ වගක් නැති බව ද විපක්ෂයේ පිරිස් මේ පිළිබඳ කතා නොකරන්නේ ඔවුන්ගේ කටවල ‘ජිනීවා පිට්ටු හිර වී’ ඇති නිසා යැයිද විමල් වීරවංශ පවසයි.

එක්සත් ජාතීන්ගේ මානව හිමිකම් කොමසාරිස්වරයෙකු සාමාන්‍යයෙන් ශ්‍රී ලංකාවේ සංචාරය කරන්නේ යම්කිසි තීරණාත්මක සිදුවීමක් සිදුවීමට මත්තෙන් බවද ඔහු මෙම සංචාරයේදී සිදුකළ ප්‍රකාශ ඉතා බරපතළ බව ද මෙවර සංචාරයේදී වෝල්කර් ටර්ක් හමුවී ඇත්තේ දෙමළ බෙදුම්වාදී අදහස් දරන්නන් පමණක් බවද ඔහු පවසයි.

යුද්ධයට නායකත්වය දුන් හමුදා ප්‍රධානීන්, නීතිඥ සංවිධාන, ජාතික සංවිධාන එක්සත් ජාතීන්ගේ මානව හිමිකම් කොමසාරිස්වරයාව හමුවීමට අවස්ථාව ඉල්ලා සිටිය ද ඒ එක ඉල්ලීමක්වත් ඔහු සැලකුවේ නැති බවද නමුත් පැලවත්තේ රතු වස්ත්‍රධාරී ටිල්වින් සිල්වාව ඉතා කැමැත්තෙන් ගොස් ඔහු මුණගැසී ඇති බව ද ජාතික නිදහස් පෙරමුණේ නායකවරයා චෝදනා කරයි.

වෝල්කර් ටර්ක්ගේ මූලිකම අභිප්‍රායක් වන්නේ ශ්‍රී ලංකාව තුළ ස්වාධීන අභිචෝදක කාර්යාලයක් පිහිටුවීම සහ සත්‍ය සෙවීම කොමිසම පිහිටුවීම බව ද ඒ අනුව යුද්ධය නිම කළ හමුදා සෙබළුන් හා ඊට දායක වූ පිරිස් කොටු කිරීම එහි අරමුණ බව ද විමල් වීරවංශ පවසයි.

මෙම අභිචෝදක කාර්යාලය හැඳින්විය හැක්කේ කොටි අභිචෝදක කාර්යාලයක් ලෙස බවද රටේ කොන්ද පණ නැති රතු වස්ත්‍රධාරී ආණ්ඩුවක් පවතින නිසා ඔවුන් මෙම කරුණු පිළිබඳ කිසිවක් රටට නොපවසන බව ද ඔහු පවසයි.

කොළඹදී පැවති මාධ්‍ය හමුවකට එක්වෙමින් ජාතික නිදහස් පෙරමුණේ නායක විමල් වීරවංශ මෙම අදහස් පළ කර ඇත.

යුද්ධය පැවති සමයේ උතුරේ හා දකුණේ බොහෝ පිරීස් මියගිය බවද නමුත් එක්සත් ජාතීන්ගේ මානව හිමිකම් කොමසාරිස්වරයාට දෙමළ බෙදුම්වාදීන් පෙන්වීමට හදන්නේ උතුරේ සාමාන්‍ය ජනයා පමණක් යුද්ධයෙන් මියගිය බවට යැයිද ඔහු මෙහිදී චෝදනා කර ඇත.