නාග ලොවින් පැමිණී සෘෂී වරයකු ‍යැයි කියනා අයෙක් සහ තවත් පුද්ගලයෙක් රිටිගල රක්ෂිතයේදී අත්අඩංගුවට!

රිටිගල දැඩි ස්වභාව රක්ෂිතයේ කොඩිගල කන්ද ප්‍රදේශයට අනවසරයෙන් ඇතුල් වී අතරමංව සිටි පුද්ගලයින් දෙදෙනෙකු රිටිගල වනසත්ව අඩවි ආරක්ෂක කාර්යාලයේ නිලධාරීන් විසින් බේරාගෙන අත්අඩංගුවට ගෙන ඇති බව වාර්තා වේ.

අත්අඩංගුවට පත්ව ඇත්තේ අනුරාධපුර, රාජාංගනය හා මාතලේ, ලග්ගල ප්‍රදේශවල පදිංචිකරුවන් දෙදෙනෙක් වන අතර ඔවුන් පුරාවිද්‍යා නටඹුන් සහිත ප්‍රදේශයෙන් රක්ෂීතයට ඇතුල්වී කොඩිගල කන්ද තරණය කරණය කර ඇත.

ඇතුල්වීම තහනම් බව සඳහන් වනජීවී සංරක්ෂණ දෙපාර්තමේන්තුවේ දැන්වීම් පුවරුද නොසලකා ඔවුන් රක්ෂීතයට ඇතුල් වී ඇති බව වනජීවී නිලධාරීහු පවසයි.

එහිදී වනජීවි නිලධාරීන්ගේ ප්‍රශ්න කිරීමේදී ඔවුන් පවසා ඇත්තේ තමන් නාග ලොවින් පැමිණී සෘෂී වරයකු බවත් භාවනා කටයුතු සඳහා රිටිගලට පැමිණී බවත් ය. සෙසු පුද්ගලයා තමන්ගේ ආවතේවකරු බවද ඔහු පවසා ඇත.

සැකකරුවන් 35 හැවිරිදි වියේ පසුවන බව සදහන් වේ.

මොවුන් සන්තකයේ තිබී ගිණී පෙට්ටි, ලයිටර් හා ඡායාරූප හා වීඩියෝ කැමරාවක්, ඇඳුම් පැළඳුම් කිහිපයක්, හක් ගෙඩියක්, ඇට මාලයක්, කුඩා ප්‍රමාණයේ උඩැක්කියක් ඇතුලු භාණ්ඩ කිහිපයක් වනජීවි නිලධාරීන් භාරයට ගෙන ඇත.

රිටිගල වනසත්ව අඩවි ආරක්ෂක ඩී රාමසිංහගේ උපදෙස් අනුව වනසත්ව අඩවි සහකාර ඒ.බී. විජේසිංහ, ක්ෂේත්‍ර සහයක ඩී.සි. බුද්ධීක, රියදුරු තුෂාර බණ්ඩාර ඇතුලු නිලධාරීන් සිදුකළ මෙහෙයුමේදී සැකකරුවන් අත්අඩංගුවට ගෙන ඇති අතර ඔවුන් කහටගස්දිගිලිය මහේසේත්‍රාත් අධීකරණයට ඉදිරිපත් කිරීමට නියමිතයි.

සිද්ධිය සම්බන්ධයෙන් වැඩිදුර විමර්ශන ක්‍රියාත්මකයි.