කහවත්ත වෙඩි තැබි​මේ සිද්ධි​යේ වැඩිදුර තොරතුරු අනාවරණය වෙයි!

පොලීසිය ලෙස පෙනී සිටි කණ්ඩායමක් විසින් තරුණයින් දෙදෙනෙකු පැහැරගෙන ගොස් එක් තරුණයෙකු වෙඩිතබා ඝාතනය කිරීමේ සිදුවීමක් කහවත්ත ඇන්දාන ප්‍රදේශයෙන් අද උදෑසන වාර්තා විය.

පැහැර ගැනුණු අනෙක් තරුණයා වෙඩි වැදීමෙන් සිදුවූ තුවාල සහිතව රොහල්ගත කෙරුණි.

පොලීසිය පවසන්නේ මත්ද්‍රව්‍ය ජාවාරමක් සම්බන්ධයෙන් පොලීසියට තොරතුරු ලබාදීම මත ඝාතනය සිදුකර ඇති බවයි.

කහවත්ත, බුංගිරිය, පලන්සූරියගම ප්‍රදේශයේ නිවසක ඊයේ (30) රාත්‍රීයේ සහෝදරයන් දෙදෙනෙකු තවත් තරුණයෙක් කතාබහ කරමින් සිටියදී මෙම සිද්ධියට මුහුණදී ඇත.

එම අවස්ථාවේදී එහි කඩාවැදුණු පුද්ගලයෙකු පවසා ඇත්තේ,” දුවන්න එපා. අපි රත්නපුර පොලීසියෙන්. ඔහොම ඉඳපල්ලා” යනුවෙනි.

එහිදී සහෝදරයන් දෙදෙනා අතරින් අයෙක් එම ස්ථානයෙන් පලාගොස් අසල වූ තේවත්තක සැඟවී තිබූ අතර පසුව තවත් අයෙකු ද එම ස්ථානයට පැමිණ තරුණයන් දෙදෙනාට මාංචුවක් දමා ඔවුන් ජීප් රථයක නංවාගෙන පලාගොස් ඇත.

පොලීසිය පැවසූවේ ඔවුන් දෙදෙනා කහවත්ත ඇන්දාන, කොස්කෑල්ල නම් ප්‍රදේශයේ පාළු ස්ථානයක් වෙත රැගෙන ගොස් ජීප් රථයෙන් බස්සවා බිම දණගස්වා ඇති බවයි.

එහිදී තරුණයන් දෙදෙනා කෑගසීමත් සමග, පැහැරගැනීම සිදුකළ කණ්ඩායමේ අයෙකු බිමට වෙඩි තබා ඇති අතර එහිදී උණ්ඩ කැබැල්ලක් එක් තරුණයෙකුගේ පාදයකට වැදී ඇතැයිද පොලීසිය පවසයි.

පසුව අනෙක් තරුණයා “මේ පොලිසියෙන් නෙවෙයි, අපිව මරන්නයි යන්නේ” යනුවෙන් කෑ ගැසීමත් සමග පිරිස ඔහුගේ ගෙල ප්‍රදේශයට වෙඩි තබා ඔවුන් පැමිණි ජීප් රථයෙන් පලාගොස් ඇති අතර තුවාල ලැබූ තරුණයාගේ කෑගැසීම හේතුවෙන් ප්‍රදේශවාසීන් පැමිණ මාංචුව කඩා ඔහුව රෝහල්ගත කර තිබූ නමුත් ගෙලට වෙඩි වැදුණු තරුණයා ඒ වනවිටත් මියගොස් ඇත.

එලෙස ඝාතනයට ලක්වුණේ 22 හැවිරිදි ඉමන්ත සුරංජන් නමැති තරුණයෙකි.

මේ අතර, මෙම ඝාතනය සම්බන්ධයෙන් පොලිස් විමර්ශනවලදී අනාවරණ වී ඇත්තේ, ඝාතනයට ලක්වූ තරුණයා හා ඔහුගේ සහෝදරයා ඔවුන් පදිංචි ප්‍රදේශයේ පුද්ගලයෙකු සමග ඉකුත් අප්‍රේල් මාසයේදී ගැටුමක් ඇතිකරගෙන ඇති බවයි.

ඒ අදාළ පුද්ගලයා සිදුකරන බව කියන ගංජා හා අයිස් මත්ද්‍රව්‍ය ජාවාරමකට මෙම සහෝදරයින් දෙදෙනා විරෝධය පළකිරීම හේතුවෙනි.

එම පුද්ගලයා ඩුබායි රාජ්‍යයේ සැඟව සිටින මත්ද්‍රව්‍ය ජාවාරම්කරුවකු වන අමිත් නැමැත්තාගේ ඥාතියෙක් වන අතර ඒ අනුව මෙම ඝාතනය මත්ද්‍රව්‍ය ජාවාරම හේතුවෙන් සිදුවී ඇතැයි පොලීසිය සැක කරයි.