රජය විසින් දියත් කරන ප්‍රජා ශක්ති ග්‍රාමීය දිළිඳු බව තුරන් කිරීමේ “ප්‍රජා ශක්ති” ජාතික වැඩසටහන අද (ජූලි 4) පස්වරු 2:00ට ජනාධිපති අනුර කුමාර දිසානායකගේ ප්‍රධානත්වයෙන් කොළඹ අරලියගහ මන්දිරයේදී එළි දැක්වේ.
ග්‍රාමීය දිළිඳු බව තුරන් කිරීම සඳහා ඉතා සංවිධිත වැඩසටහනක් මේ වනවිට සකස් කර ඇති බවත් එම වැඩසටහන අද දින එළිදක්වන බවත් ග්‍රාමීය සංවර්ධන, සමාජ ආරක්ෂණ සහ ප්‍රජා සවිබල ගැන්වීම පිළිබඳ අමාත්‍ය ආචාර්ය උපාලි පන්නිල ඊයේ පැවති මාධ්‍ය හමුවකදී පැවසීය.
ග්‍රාමීය දිළිඳු බව තුරන් කිරීම සහ ග්‍රාමීය සංවර්ධය ඉලක්ක කර ගත් අන්තර්කරණීය වූ වැඩපිළිවෙලක් මේ වනවිට සකස් කර ඇති බවත් සංවර්ධනය සඳහා ජනතාව සක්‍රිය ලෙස සම්බන්ධ කරගෙන ඇති බවත් පැවැසූ අමාත්‍යවරයා ගම පොහොසත් කිරීම ඉලක්ක කිරීමේ දැවැන්ත වැඩසටහන් මාලාවක් මේ තුළ ක්‍රියාත්මක වන බවද අමාත්‍යවරයා සඳහන් කළේ ය.
මේ වැඩසටහන තුළ මුලින් කී අරමුණ ඒකාබද්ධ සහ අන්තර්කරණීය සංවිධාන ව්‍යුහය සඳහා අලුතින් හඳුන්වා දෙන සංවිධාන ව්‍යුහයන් තුනකින් සමන්විත වන බවත් ඒ අනුව දිස්ත්‍රික් මට්ටමින් සම්බන්ධීකරණ කමිටු සහ ප්‍රාදේශීය සංවර්ධන කමිටුව ඉක්මවා ගිය ග්‍රාම නිලධාරි වසම් 14,008ක ප්‍රජා සංවර්ධන සභාවක් නිර්මාණය කරන බවත් ඒ ඔස්සේ සෘජුව ම ගමේ සංවර්ධනය සඳහා ප්‍රජාව සහ රජයේ නිලධාරීන් එක්ව මෙම ප්‍රජා සංවර්ධන සභාව පිහිටුවන අතර එයින් අදාළ ප්‍රදේශයේ සංවර්ධනය සහ ගමට ගැළපෙන සංවර්ධන යෝජනා ක්‍රියාත්මක කිරීමේ වගකීම මෙම සභාවන්ට පැවරෙන බවද සඳහන් කළේ ය.
