සාමණේර හිමිනමකට ලිංගික අඩත්තේට්ටම් කල විහාරාධිපති හිමිනමක් අත්අඩංගුවට!

ලුණුගම්වෙහෙර ප්‍රදේශයේ පන්සලක විහාරාධිපති හිමිනමක් විසින් එම පන්සලේ ම වැඩ වාසය කළ අවුරුදු 13ක සාමණේර හිමි නමකට පෙරේදා (06) පහර දී ලිංගික අඩත්තේට්ටම් කළ බව පවසා ලුණුගම්වෙහෙර පොලිසියට පැමිණිල්ලක් ලැබී ඇති බව වාර්තා වේ.

ඒ අනුව මෙම විහාරාධිපති හිමිනම විසින් පෙරේදා (06) රාත්‍රියේ දී සාමණේර හිමිනමට පහර දී ලිංගික අතවර කළ බවට ලුණුගම්වෙහෙර පොලිසියට ඊයේ (07) සිදු කරන ලද පැමිණිල්ලකට අනුව විහාරාධිපති හිමි නම අත්අඩංගුවට ගෙන ඇති අතර, සැකකාර හිමිනම තිස්සමහාරාම මහේස්ත්‍රාත් හා දිසා විනිසුරුවරයා වෙත ඉදිරිපත් කරන බව ලුණුගම්වෙහෙර පොලිසිය පවසයි.

වින්දිත සාමණේර හිමි නම වෛද්‍ය වාර්තාවක් ලබා ගැනීම සඳහා හම්බන්තොට මහ රෝහලට ඇතුළත් කර ඇත.

මෙම විහාරස්ථානයේදී ඇසළ පොහොය නිමිත්තෙන් මෙම මස 10 වැනිදා සිට දින හතක ඇසළ කලාපයක් පැවැත්වීමට කටයුතු සූදානම් කර තිබූ වටපිටාව​ක මෙම සිදුවීම සිදු වී ඇති අතර, මේ සිද්ධියත් සමඟ විහාරස්ථානයේ දායක සභාව විසින් එම උත්සවය අවලංගු කරන ලෙස ලුණුගම්වෙහෙර පොලිස් ස්ථානයෙන් ඉල්ලීමක් කර ඇති බව සඳහන් වේ.

මේ පිළිබඳව වැඩිදුර පරීක්ෂණ ලුණුගම්වෙහෙර පොලිසිය සිදුකරයි.