එල්.ටී.ටී.ඊ. සංවිධානයේ අවි ආයුධ සොයා පුදුකුඩිඉරිප්පු භූගත බංකරයක කැනීම් ආරම්භ කරයි!

එල්.ටී.ටී.ඊ. සංවිධානයේ නායක වේලුපිල්ලේ ප්‍රභාකරන් ඇතුළු එම සංවිධානයේ නායකයින් භාවිත කළ බවට සැකකෙරෙන අවි ආයුධ තොගයක් සොයා මුලතිව්, පුදුකුඩිඉරිප්පු මන්දුවිල්හි භූගත බංකරයක කැනීම් ආරම්භ කර ඇත.

මුලතිව් මහේස්ත්‍රාත් අධිකරණයෙන් ලද නියෝගයක් අනුව පොලිසිය සහ විශේෂ කාර්ය බලකා බෝම්බ නිෂ්ක්‍රීය අංශය විසින් කැනීම් කටයුතු ආරම්භ කර ඇත.

එල්.ටී.ටී.ඊ. සංවිධානයේ නායක වේලුපිල්ලේ ප්‍රභාකරන් ඇතුළු එම සංවිධානයේ නායකයින් භාවිත කළ බවට සැකකෙරෙන අවි ආයුධ තොගයක් සොයා පොලිසිය සහ විශේෂ කාර්ය බලකා බෝම්බ නිෂ්ක්‍රීය අංශය එක්ව මුලතිව්, පුදුකුඩිඉරිප්පු මන්දුවිල්හි භූගත බංකරයක කැනීම් කටයුතු ඊයේ ආරම්භ කරනු ලැබීය.

ඒ, පුදුකුඩිඉරිප්පු පොලිස් ස්ථානාධිපතිවරයා වෙත ලැබුණු බුද්ධි තොරතුරක් මත මුලතිව් මහේස්ත්‍රාත් අධිකරණය වෙත කරුණු වාර්තා කිරීමෙන් අනතුරුව ලද නියෝගයක් අනුවයි.

අඩි 20ක් පමණ ගැඹුරින් යුත් මෙම භූගත බංකරයට පසුගිය යුද සමයේ ආරක්ෂක අංශවලින් එල්ල වූ ප්‍රහාර හේතුවෙන් ඊට ඇතුළුවන ස්ථාන විනාශ වී ගොස් තිබේ.

2009 වසරේදී මෙම ස්ථානය එල්.ටී.ටී.ඊ. සංවිධානය ප්‍රධාන කඳවුරක් ලෙස භාවිත කර ඇති අතර කඳවුරේ විශාලත්වය අක්කර දෙකකට අධික බව පොලීසිය පවසයි.

සිවිල් වැසියන් සතුවූ ඉඩම් අත්පත් කරගෙන ඉදිකර තිබූ මෙම කඳවුර ආරක්ෂක අංශ යටතට පත්වීමෙන් අනතුරුව බිම් බෝම්බ ඉවත් කර නැවත මුල් හිමිකරුවන් වෙත භාරදී ඇති අතර භූගත බංකරයට පිටස්තර පාර්ශවයන්ට ඇතුළුවිය නොහැකිවන සේ ආරක්ෂක අංශ විසින් පස් දමා වසා ඇත.

පොලිසිය සඳහන් කළේ, එවකට එල්.ටී.ටී.ඊ. සංවිධානය විසින් සිවිල් වැසියන්ගෙන් පැහැරගත් රත්තරන් සඟවා ඇති බවට වූ සැකයන් මත විවිධ පිරිස් භූගත බංකරය හෑරීමටද උත්සාහ දරා ඇති බවයි.

විශේෂ කාර්ය බලකා බෝම්බ නිෂ්ක්‍රීය අංශයේ මගපෙන්වීම යටතේ බැකෝ යන්ත්‍ර උපයෝගී කර ගනිමින් කැනීම් කටයුතු සිදුකරන අතර පුරාවිද්‍යා නිලධාරීන්, අධිකරණ නිලධාරීන් එම කටයුතු නිරීක්ෂණය කරනු ලබයි.