කිඹුලාවල මාර්ග දෙපස වෙළඳසල් ඉවත් කිරීමට උත්සහ කිරීම හේතුවෙන් උණුසුම් තත්ත්වයක්!

කිඹුලාවල ප්‍රදේශයේ මාර්ග දෙපස පිහිටා තිබූ වෙළඳසල් ඉවත් කිරීමට උත්සහ කිරීම හේතුවෙන් අද දහවල් (11) උණුසුම් තත්ත්වයක් ඇති වී ඇති බව වාර්තා විය.

එහිදී එම ඉදිකිරීම් නීතිවිරෝධී බවට පවසමින් මාර්ග සංවර්ධන අධිකාරියේ නිලධාරින් පිරිසක් විසින් වෙළඳසැල් ඉවත් කිරීමට උත්සාහ කර තිබුණි.

කෙසේ නමුත් මීට පෙර 2023 දී මෙලෙසම වෙළඳසැල් ඉවත් කිරීමට උත්සාහ ගත් අතර, එයට එම අවස්ථාවේදීද එරෙහි වී තිබු අතර පෙබරවාරි 24 වන විට එම ඉදිකිරීම් ඉවත් කරන ලෙසත්, ඒවා නීතිවිරෝධී බවත් කියමින් නාගරික සංවර්ධන අධිකාරිය මැදිහත් වූ නමුත් ඒවා ඉවත් කිරීමට හැකි වි තිබුනේ නැත.

පසුව පසුගිය 2024 පෙබරවාරි 21 වැනිදා විපක්ෂයේ පාර්ලිමේන්තු මන්ත්‍රී හර්ෂ ද සිල්වා කළ විමසීමකදී එවකට නාගරික සංවර්ධන අමාත්‍ය ප්‍රසන්න රණතුංග පැවසුවේ වෙළඳසැල් ඉවත් නොකරන බවත් ඒවා විධිමත් කරන බවත් ය.

කෙසේ වෙතත්, අද දහවල් පැමිණ සිටියේ නාගරික සංවර්ධන අධිකාරියේ නිලධාරීන් නොව, මාර්ග සංවර්ධන අධිකාරියේ නිලධාරීනු බව වාර්තා වේ. එම නිලධාරීන් පිරිස විසින් වෙළඳසැල් කිහිපයක් කඩා ඉවත් කර එහි තිබූ භාණ්ඩ ලොරියක පටවා ගෙන යාමත් සමඟ වෙළෙඳුන් හා නිලධාරීන් අතර උණුසුම් තත්වයක් හට ගෙන ඇත.

එම තත්වය පාලනය කිරීම සඳහා පොලිසියද එම ස්ථානයට පැමිණි අතර, සිදුවූ අර්බුදය අඩු කිරීමට උත්සාහ ගෙන ඇත.

ඇති වූ උණුසුම් තත්වය හමුවේ මාර්ග සංවර්ධන අධිකාරියේ නිලධාරීන් විසින් ලොරියට පටවාගත් භාණ්ඩ නැවත වෙළෙඳුන් වෙත ලබාදීමටද කටයුතු කර තිබු අතර එහිදි මාර්ග සංවර්ධන අධිකාරියේ නිලධාරීන් කියා ඇත්තේ මෙම වෙළඳසැල් නීතිවිරෝධී බවයි.

මෙම මාර්ගය මාර්ග සංවර්ධන අධිකාරිය සතු දේපළ බව ඔවුන් පවසා ඇති අතර ඒ අනුව ඒවා නීතිවිරෝධී බවට නිත්‍යානුකූල ලියකියවිලි ඉදිරිපත් කර පසුව ඉවත් කරගන්නා ලෙස දැනුම් දී තිබේ.