කෙහෙළිය රඹුක්වැල්ලගේ නඩුවේ අධි චෝදනා පත්‍ර භාරදිම කල් ගියේ ඇයි ? විස්තරය මෙන්න!

ප්‍රමිතියෙන් තොර ප්‍රතිදේහ එන්නත් මිලදී ගැනීමේ සිද්ධිය සම්බන්ධයෙන් හිටපු සෞඛ්‍ය අමාත්‍ය කෙහෙළිය රඹුක්වැල්ල ඇතුළු විත්තිකරුවන් 12 දෙනෙකුට එරෙහි නඩුවේ අධි චෝදනා පත්‍ර සමග භාරදිය යුතු ඇමුණුම් මේ දක්වා මුද්‍රණය කර ලැබී නොමැති බැවින් එම අධි චෝදනා භාර දීම සැප්තැම්බර් මස 16 වනදා දක්වා කල් තැබීමට කොළඹ ස්ථිර ත්‍රිපුද්ගල මහාධිකරණ විනිසුරු මඩුල්ල තීරණය කර ඇත.

මෙම නඩුකරයට අදාළ චෝදනා පත්‍ර අධිකරණය හමුවේ ගොනු කර තිබූණද ඊට අදාළ ඇමුණුම් මේ වන විට ගොනු කර නොමැති බව පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජෙනරාල් ලක්මිණි ගිරිහාගම මෙනවිය අධිකරණයට දැනුම් දී ඇත.

එක් විත්තිකරුවකු වෙනුවෙන් ඇමුණුම් මුද්‍රණය කිරීම සඳහා රුපියල් 866,565/- ක් වැය වන බව සඳහන් කළ රජයේ නියෝජ්‍ය සොලිසිටර් ජෙනරාලවරිය මේ ආකාරයෙන් විත්තිකරුවන් දොළොස් දෙනෙකු වෙනුවෙන් අදාල ඇමුණුම් මුද්‍රණය කිරීමට නියමිතව තිබෙන බවත් ඇය කියා ඇත.

එම ඇමුණුම් ලැබීමට දින 21 ක් පමණ ගතවනු ඇති බවට රජයේ මුද්‍රණාලාධිපතිවරයා දැනුම් දී ඇති නිසා දින 21කට පසුව එළඹෙන දිනයක මෙම නඩුව කැඳවන ලෙස ඇය අධිකරණයෙන් ඉල්ලීම් කර ඇත.

ඒ අනුව අදාල නඩුව සැප්තැම්බර් මස 16 වන දා කැඳවීමටද අධිකරණය නියම කර ඇත.

මෙම නඩුව අද මහේෂ් වීරමන්, ප්‍රදීප් අබේරත්න සහ අමාලි රණවීර යන අයගෙන් සමන්විත ත්‍රිපුද්ගල ස්ථිර මහාධිකරණ විනිසුරු මඩුල්ල ඉදිරියේ කැඳවනු ලැබීය.

එම අවස්ථාවේදී නඩුවේ පළමුවන විත්තිකරු ලෙස නම් කර සිටි සුදත් ජනක ප්‍රනාන්දු නමැත්තා අධිකරණයේ පෙනී නොසිටි අතර ඔහු මේ වන විට රක්ෂිත බන්ධනාගාරගතව සිටින බව දැනුම් දී ඇත.

එමෙන්ම තවත් විත්තිකරුවෙකු වන වෛද්‍ය සැපයීම අංශයේ හිටපු වෛද්‍යවරයකු වන ජයනාත් බුත්පිටියද අධිකරණයේ පෙනී නොසිටි අතර ඔහු විදේශගතව සිටින බවත් ඔහුගේ නීතිඥවරයා අධිකරණයට දන්වා ඇත.

ඉන් අනතුරුව අධිකරණය හමුවේ කරුණු දැක්වූ නියෝජ්‍ය සොලිසිටර් ජනරාල්වරිය මෙම නඩුවේ පළමුවන විත්තිකරු වන සුදත් ජනක ප්‍රනාන්දු නමැත්තා මේ වන විට රක්ෂිත බන්ධනාගාර ගතව සිටින බවත්, ඔහු මීළඟ නඩු දිනයේ අධිකරණයට ඉදිරිපත් කරන ලෙස බන්ධනාගාර නිලධාරීන්ට නියෝගයක් නිකුත් කරන ලෙසත් ඉල්ලා සිටියාය.

එම ඉල්ලීම පිළිගත් ත්‍රිපුද්ගල මහාධිකරණ විනිසුරු මඩුල්ල අදාල විත්තිකරු මීළඟ නඩු දිනයේ අධිකරණයට ඉදිරිපත් කරන ලෙස බන්ධනාගාර බලධාරීන්ට නියම කළේය.

තවදුරටත් කරුණු දැක්වූ නියෝජ්‍ය සොලිසිටර් ජෙනරාල් වරිය මෙම නඩුවේ තවත් විත්තිකරුවකු වන වෛද්‍ය ජයනාත් බුත්පිටිය නමැති විත්තිකරු 2023 වසරේ දෙසැම්බර් මස 11 වනදා රාජකාරී නිවාඩු මත එක්සත් රාජධානියට ගොස් සිටින අතර ඔහු 2024 වසරේ පෙබරවාරී මස 09 වනදා ඔහු යළි දිවයිනට පැමිණීමට නියමිතව තිබූ බව සඳහන් කර ඇත.

ඔහු මේ වනතෙක් දිවයිනට පැමිණ නොමැති බවත් ඔහු අත්අඩංගුවට ගැනීම සඳහා වරෙන්තු නිකුත් කොට ජාත්‍යන්තර පොලිසිය හරහා රතු නිවේදන නිකුත් කර තිබෙන බවත් ඇය සඳහන් කර ඇත.

ඔහු හිතාමතාම අධිකරණය මග හරින පුද්ගලයෙකු බවට පැහැදිලි දැනුමක් තිබෙන බැවින් මෙම රතු නිවේදන ලබා ගැනීමට කටයුතු කර තිබෙන බවත් ඇය වැඩිදුරටත් සඳහන් කර ඇත.

ඉන් අනතුරුව අදාල නඩුව සැප්තැම්බර් මස 16 වන දා කැඳවීමටද දින නියම වුණා.

හියුමන් ඉමියුනොග්ලොබින් සහ රිටොප්සිමැප් නැමැති ඖෂධ නොවන වෙනත් ද්‍රව්‍ය කුප්පි 6,195ක් සෞඛ්‍ය අමාත්‍යාංශයේ වෛද්‍ය සැපයුම් අංශයට සපයා ශ්‍රී ලංකා ජනරජයේ මුදල් රුපියල් ලක්ෂ 1,444ක් වංක ලෙස ව්‍යපහරණය කිරීමට කුමන්ත්‍රණය කිරීම සහ එම මුදල් සාපරාධී සාවද්‍ය පරිහරණය සම්බන්ධයෙන් හිටපු අමාත්‍ය කෙහෙලිය රඹුක්වැල්ල ඇතුළු විත්තිකරුවන්ට එරෙහිව නීතිපතිවරයා විසින් චෝදනා 13 ක් එල්ල කර තිබේ.

මෙම නඩුවේ සෙසු විත්තිකරුවන් ලෙස සෞඛ්‍ය අමාත්‍යාංශයේ හිටපු ලේකම් ජනක ශ්‍රී චන්ද්‍රගුප්ත, වෛද්‍ය සැපයුම් අංශයේ හිටපු අධ්‍යක්ෂ වෛද්‍ය කපිල වික්‍රමනාය , වෛද්‍ය සැපයුම් අංශයේ නියෝජ්‍ය අධ්‍යක්ෂ ජනරාල් රණ කුමාර හේරත්, අතිරේක ලේකම් වෛද්‍ය සමන් රත්නායක, ජාතික ඖෂධ නියාමන අධිකාරියේ ප්‍රධාන විධායක නිලධාරී වෛද්‍ය විජිත් ගුණසේකර ඇතුළු පිරිසක් නම් කර ඇත.

මෙම නඩුවේ සාක්ෂිකරුවන් ලෙස පුද්ගලයින් 350කට ආසන්න සංඛ්‍යාවක් නම් කර ඇත.

එම සාක්ෂිකරුවන් අතර හිටපු ජනාධිපති රනිල් වික්‍රමසිංහ, හිටපු අමාත්‍යවරුන් වන නිමල් සිරිපාල ද සිල්වා, විජයදාස රාජපක්ෂ, ඩග්ලස් දේවානන්ද, රොෂාන් රහසිංහ යන හිටපු කැබිනට් අමාත්‍යවරුද ඇතුළත් වෙති.

ඊට අමතරව ජාතික ඖෂධ නියාමන අධිකාරියේ සභාපති වෛද්‍ය ආනන්ද විජේවික්‍රම ඇතුළු වෛද්‍යවරු කණ්ඩායමක්ද ඊට ඇතුළත් වේ.

එමෙන්ම මෙම නඩුවට අදාළව නඩු භාණ්ඩ 300කට ආසන්න සංඛ්‍යාවක් ද පැමිණිල්ල විසින් ඉදිරිපත් කර තිබේ.