තීරුබදු අර්බුදය හමුවේ චීන-ඇමරිකා සබඳතාවලට කොළ එළියක්?

ඇමරිකාව යළි පැනවූ තීරුබදු හමුවේ බොහෝ රටවල් ගැටලුකාරී තත්ත්වයකට මුහුණ පා සිටිය ද ඇමරිකාවේ චීනය සම්බන්ධ පිළිවෙත සාකච්ඡා මට්ටමින් ඉදිරියට යන බවක් වාර්තා වේ.

මේ සම්බන්ධයෙන් චීනය ඊයේ(10) ප්‍රකාශයක් සිදු කරමින් කියා සිටියේ චීනය සහ ඇමරිකාව ආර්ථික හා වෙළඳ ක්ෂේත්‍රවල ඔවුන්ගේ අවශ්‍යතා සම්බන්ධයෙන් සමීප සන්නිවේදනයක් පවත්වාගෙන යන බවයි.

එළඹෙන අගෝස්තු ආරම්භයේ චීන-ඇමරිකා සාකච්ඡා යළි පවත්වන්නේද යන්න පිළිබඳව මාධ්‍ය හමුවකදී ප්‍රතිචාර දක්වමින් චීන වාණිජ අමාත්‍යාංශ ප්‍රකාශිකා He Yongqian මේ බව සඳහන් කර තිබේ.

මෙම වසරේ මැයි මාසයේ සිට, චීන හා ඇමරිකා රාජ්‍ය නායකයින් එළඹ ඇති එකඟතාවන්හි මඟ පෙන්වීම යටතේ, දෙපාර්ශ්වයේ ආර්ථික හා වෙළඳ කණ්ඩායම් ජිනීවා සහ ලන්ඩනයේදී ඉහළ මට්ටමේ ආර්ථික හා වෙළඳ සාකච්ඡා පවත්වනු ලැබු අතර ඒ ඔස්සේ සම්මුතියකට එළඹි බව ඇය සඳහන් කරයි.

දෙපාර්ශ්වය අදාළ පියවර කඩිනමින් ක්‍රියාත්මක කිරීම හේතුවෙන් දෙරට ආර්ථික හා වෙළඳ සබඳතා ස්ථාවර වී‍ ඇති බව ඇය පවසයි.‍

චීන-ඇමරිකානු නායකයන්ගේ වැදගත් එකඟතා ප්‍රායෝගිකව ක්‍රියාත්මක කරමින් දෙරටේ ආර්ථික හා වෙළඳ සබඳතාවයේ ස්ථාවර, විධිමත් හා අඛණ්ඩ සංවර්ධනය ඒකාබද්ධව ප්‍රවර්ධනය කිරීම චීනයේ අපේක්ෂාව වන බව ද ඇය සඳහන් කර ඇත.

මේ අතර අනෙකුත් රටවලට පැනවූ ඇමරිකානු බදු සම්බන්ධයෙන් ප්‍රකාශයක් කරමින් චීනය පවසන්නේ තීරුබදු අනිසි ලෙස භාවිත කිරීම කිසිවෙකුගේ අවශ්‍යතා සඳහා යෝග්‍ය නොවන බවයි.

ජාතික ආරක්ෂක හේතූන් මත ආනයනික තඹ සඳහා 50% ක තීරු බද්දක් පනවන බවට ඇමරිකානු ජනාධිපති ඩොනල්ඩ් ට්‍රම්ප් පසුගියදා (09) නිවේදනය කළ අතර ඒ පිළිබඳ අදහස් දක්වමින් ඊයේ (10) පැවති මාධ්‍ය හමුවේ දී චීන විදේශ අමාත්‍යාංශ ප්‍රකාශිකා Mao Ning පැවසුවේ මෙම ගැටලුව සම්බන්ධයෙන් චීනයේ ස්ථාවරය ඉතා පැහැදිලි බවත්, ජාතික ආරක්ෂාව පිළිබඳ සංකල්පය අනිසි ලෙස භාවිත කිරීමට චීනය සැමවිටම විරුද්ධ වන බවත් ය.

තීරුබදු යුද්ධ සහ වෙළඳ යුද්ධවලින් කිසිවිටක ජයග්‍රාහකයින් බිහි නොවන බව චීනය දැඩිව විශ්වාස කරන බවත්, තීරුබදු අනිසි ලෙස භාවිත කිරීම කිසිදු පාර්ශ්වයකට හිතකර නොවන බවත් ඇය එහිදී සඳහන් කර ඇත.