ආරුගම්බේ​හි අඩ නිරුවතින් ගමන් කළ තායිලන්ත කාන්තාවක් අත්අඩංගුව​ට!

පොතුවිල් පොලිස් ස්ථානයේ කාන්තා හා ළමා කාර්යාංශයේ නිලධාරිනියන් ඊයේ (14) දින අරුගම්බේ සංචාරක කලාපයේ අඩ නිරුවතින් ගමන් කළ තායිලන්ත ජාතික සංචාරිකාවක් අත්අඩංගුවට ගෙන ඇති බව වාර්තා වේ.

ඒ අනුව අදාල සිද්ධිය ඊයේ දින මධ්‍යාහ්න 12:30 ට පමණ සිදුව ඇති අතර එම කාන්තාව එක් හෝටලයක සිට තවත් හෝටලයකට අඩ නිරුවතින් ගමන් කරමින් සිටින විට මෙසේ අත්අඩංගුවට ගැනීමට පියවර ගෙන ඇත.

ඇය තායිලන්ත ජාතිකයෙක් බව පොතුවිල් පොලිසිය පවසයි.

ලැබුණු පොලිස් වාර්තාවලට අනුව “බීච් හට්” හෝටලයේ සිට “ඕෂන් ස්කයි” හෝටලයේ පිවිසුම දක්වා ඇය උඩුකය නිරුවත්ව මෙසේ ගමන් කර ඇති අතර ඒ අනුව සංචාරකයින් සහ ප්‍රදේශවාසීන් සිද්ධිය දැක පොලිසියට දැනුම් දීමත් සමඟ පොලිසිය කඩිනමින් ඇය අත්අඩංගුවට ගෙන ඇති බව සඳහන් වේ.

එසේම පොලිස් නිලධාරීන් සහ පොතුවිල් පොලිසියේ කාන්තා නිලධාරිනියන් ඇය සොයා ගෙන, පොතුවිල් පොලිස් ස්ථානයට රැගෙන ගොස් තිබෙන අතර අද දින (15) ඇයව පොතුවිල් මහේස්ත්‍රාත් අධිකරණයට ඉදිරිපත් කිරීමට නියමිතව ඇති බව පවසයි.

සිදු කළ විමර්ශනවලින් අනාවරණය වී ඇත්තේ ඇමරිකානු ජාතිකයෙක් හා මෙරටට පැමිණි ඇය මෙම මාසයේ 11 සිට 20 දක්වා අරුගම්බේ ප්‍රදේශයේ සංචාරක හෝටලයක නවාතැන් ගෙන සිටි බවයි.

කෙසේ වෙතත් ඇය 1841 අංක 4 දරන ආඥාපනතේ පොදු ස්ථානයක අසභ්‍ය හෝ අශෝභන හැසිරීම යටතේ අධිකරණයට ඉදිරිපත් කිරීමට නියමිතව ඇති අතර පොතුවිල් පොලිසිය මෙම සිද්ධිය පිළිබඳව තායිලන්ත තානාපති කාර්යාලය දැනුවත් කර ඇත.