කිරි ගවයන් වෙනුවට ගව ශුක්‍රාණු ආනයනය කිරීමට රජයෙ​න් පියවර!

කිරි ගවයන් වෙනුවට ඉහළ තත්ත්වයෙන් යුත් ගව ශුක්‍රාණු ආනයනය කිරීමට පියවර ගන්නා බව කෘෂිකර්ම නියෝජ්‍ය ඇම​ති නාමල් කරුණාරත්න පවසයි.

ජාතික පශු සම්පත් සැලැස්ම එළි දැක්වීමේ උළෙලට එක්වෙමින් නියෝජ්‍ය ඇමැතිවරයා ඊයේ (14) මේ බව සඳහන් කර ඇත.

නාමල් කරුණාරත්න මෙහිදී පෙන්වා දුන්නේ, මේ යටතේ ක්‍රියාත්මක ඉතාමත් දියුණු තත්වයේ ගවයන් පහළොස් දහසකට වැඩි ප්‍රමාණයක් බිහි කිරීමේ සැලැත්මක් කෘෂිකර්ම දෙපාර්තමේන්තුව සතු බවයි.

රජය මීට පෙර ඔස්ට්‍රේලියාවෙන් මෙරටට ගවයින් ආනයනය කිරීමට කටයුතු කළ අතර එම ව්‍යාපෘතිය අසාර්ථක වූ බව ද නියෝජ්‍ය අමාත්‍ය නාමල් කරුණාරත්න මහතා මෙහිදී පවසා සිටියා.

පහුගිය කාලයේ ඔස්ට්‍රේලියාවෙන් ගෙනාවා හරක්. ගෙනල්ලා විශාල විනාශයක් රටට කළා. ඒ හරක් අපේ රටට ගැලපෙන්නේ නැහැ. හරක් 5,000ක් ගෙනල්ලා අද හරක් 400ක් වත් නැහැ. ඒ හරක්ට විශාල වශයෙන් ලෙඩ තිබුණා. අකටයුතුකම් ගොඩක් සිද්ධ වෙලා තියෙනවා. ඒ නිසා අපි එවැනි දේවල් තෝරනවා වෙනුවට ඒ දියුණු සතුන්ගේ තෝරා ගත්ත ශුක්‍රාණු අපේ රටට ගෙනල්ලා ඉවර වෙලා අපේ රටේ සත්තුන්ට අපිට උචිත විදිහට කර්මාන්තය ගොඩනගන සැලැස්මක අපි ඉන්නේ.”

“හොඳ ම සත්තු ලබා දීම සඳහා අපි වැඩපිළිවෙළක් ක්‍රියාත්මක කරලා තියෙනවා. විශේෂයෙන් ම ලිංග නිර්ණය කරන ලද ශුක්‍ර වඩි ආනයනය කරලා ඉතාමත් දියුණු සත්තු 15,000කට වැඩි සංඛ්‍යාවක් රට තුළ නිර්මාණය කර ගැනීමේ සැලැස්මක් අපේ දෙපාර්තමේන්තුව සැලසුම් කරලා තියෙනවා.”

කෙසේවෙතත්, බීබීසී සිංහල සේවය වෙත අදහස් දක්වමින් මහනුවර සත්ව අභිජනන මධ්‍යස්ථානයේ වෛද්‍යවරයෙක් සඳහන් කර ඇත්තේ, ශ්‍රී ලංකාව තුළ ගව ශුක්‍රාණු ආනයනය කිරීම දැනටමත් සිදුකරන බවයි.

වඩා හොඳ ජාන සහිත පිරිමි ගවයින්ගේ ශුක්‍රාණු ආනයනය දිගු කාලයක් ඔස්සූ සිදු කෙරෙන ක්‍රියාවලියක් බවත් විවිධත්වයක් සහිත සතුන් බිහි කිරීම මෙහි අරමුණ බවත් ඔහු පෙන්වා දි ඇත.