තරුණයෙකු දණගස්වා වෙඩි තබා ඝාතනය කර සිද්ධියේ සැකකරුවන් 4 දෙනෙකු අත්අඩංගුවට!

කහවත්ත ප්‍රදේශයේදී තරුණයෙකු දණගස්වා වෙඩි තබා ඝාතනය කර තවත් අයෙකුට තුවාල සිදුකිරීමේ සිද්ධිය සම්බන්ධයෙන් සිදුකෙරෙන විමර්ශනවලට අදාළව සැකකරුවන් 4 දෙනෙකු අත්අඩංගුවට ගෙන ඇති බව වාර්තා වේ.

අදාළ සිද්ධියට ආධාර අනුබල දුන් සැකකරුවන් 4 දෙනෙකු මෙලෙස අත්අඩංගුවට ගෙන ඇති අතර තරුණයින් පැහැර ගැනීම සඳහා යොදා ගත් ජීප් රථයද සොයාගත් බව බස්නාහිර පළාත් උතුර අපරාධ කොට්ඨාසය පවසයි.

ඉකුත් 30 වැනිදා රාත්‍රීයේ කහවත්ත, බුංගිරිය, පලන්සූරියගම ප්‍රදේශයේ නිවසක සහෝදරයන් දෙදෙනෙකු තවත් තරුණයෙක් සමග කතාබහ කරමින් සිටියදී මෙම සිද්ධියට මුහුණදී තිබුණි.

එහිදී සහෝදරයන් දෙදෙනා අතරින් අයෙක් එම ස්ථානයෙන් පලාගොස් තිබූ අතර අනෙක් දෙදෙනාව අත් මාංචු දමා පොලීසිය යැයි පවසා පැහැරගත් සැකකරුවන් ඉන් එක් තරුණයෙකු දණගස්වා වෙඩිතබා ඝාතනය කළ අතර අනෙක් තරුණයා වෙඩි වැදීමෙන් සිදුවූ තුවාල සහිතව රෝහල් ගත කර තිබුණි.

අත්අඩංගුවට ගත් එම සැකකරුවන් ඩුබායි රාජ්‍යයේ සැඟව සිටින තනූජ සම්පත් නොහොත් ‘හෝමාගම හඳයා’ නමැති සංවිධානාත්මක අපරාධකරුගේ සමීපතමයින් බව පොලීසිය කියයි.

එකී අපරාධය සිදුකර ඇත්තේ මත්ද්‍රව්‍ය ජාවාරමේ ඔත්තු ලබාදීම සම්බන්ධයෙන් ඇතිවූ සැකයක් හේතුවෙන් බවද පොලීසිය පවසයි.

මෙලෙස ඝාතනය කර තිබුණේ කහවත්ත පලන්සූරියගම පදිංචිව සිටි දේශාන් ඉරන්ත නමැති 22 හැවිරිදි තරුණයෙකි.

අදාළ සැකකරුවන් සමග එදින එම තරුණයන් පැහැර ගැනීමට යොදාගත් ජීප් රථය, මෝටර් රථයක්, යතුරුපැදි 3ක්, ලියාපදිංචි අංක තහඩු 2ක්, හෙරොයින් මත්ද්‍රව්‍ය ග්‍රෑම් 197ක් සහ අයිස් මත්ද්‍රව්‍ය ග්‍රෑම් 96ක් ද පොලිස් භාරයට ගෙන ඇත.

තරුණයන් පැහැර ගැනීමට යොදාගත් ජීප් රථය මීගොඩ පොලිස් වසමේ සඟවා තිබියදී සොයාගෙන තිබේ.

අත්අඩංගුවට ගත් සැකකරුවන්ට හෝමාගම, හා පාදුක්ක ප්‍රදේශවල පදිංචි වයස අවුරුදු 27ත් 29ත් අතර වයස්වල පසුවන කිසිඳු රැකියාවක් නොකරන පුද්ගලයින් බව පොලීසිය පවසයි.

ඔවුන් සංවිධානාත්මක අපරාධකරුවෙකු වන ‘හඳයා’ නමැත්තාගේ මත්ද්‍රව්‍ය ජාවාරමට සම්බන්ධ පුද්ගලයින් බවද හෙළිවී ඇති අතර ඝාතනයට සෘජුවම සම්බන්ධ පුද්ගලයින් මේ වනවිට හඳුනාගෙන ඇති බවත් ඔවුන් ඉතා ඉක්මණින් අත්අඩංගුවට ගන්නා බව පොලිසිය පවසයි.

බස්නාහිර පළාත් උතුරු අපරාධ කොට්ඨාසය සිද්ධිය සම්බන්ධයෙන් වැඩිදුර විමර්ශන සිදුකරයි.