ශ්‍රී ලංකාවේ තුන්වැනි විශාලතම සමූහ මිනීවල බවට චෙම්මනි සමූහ සුසානය පත්වෙයි!

වසය අවුරුදු හතරත්, පහත් අතර දැරිවියකගේ අස්ථි ද ගොඩගෙන ඇති යුද පීඩිත උතුරෙන් අලුතින්ම හමුවූ සමූහ සුසානය දැනට හඳුනාගත් මිනිස් සිරුරු සංඛ්‍යාව අනුව රටේ තුන්වැනි තැනට පැමිණ ඇති බව වාර්තා වේ.

2025 වසරේ මැයි මස මැද සිට චෙම්මනි සිත්තුපාත්ති සමූහ සුසානයේ කරන ලද කැනීම්වලින් මේ දක්වා කුඩා දරුවන්ගේ ඇතුළු මිනිස් ඇටසැකිලි 85 ක් මතුකරගෙන තිබේ.

මීට ඉහත තුන්වැනියට විශාල සමූහ මිනීවල ලෙස හඳුනාගෙන තිබුනේ 2023 වසරේ දී මිනිස් සිරුරු 82 ක අස්ථි කොටස් ගොඩ ගත් මන්නාරම, තිරුකේතීස්වරම් සමූහ මිනී වලයි.

දෙවැනි අදියරේ කැනිම් කටයුතු සිදු කළ 18 වැනි දිනය වු ජුලි 23 වැනි බදාදා හවස් යාමයේ වින්දිතයන් වෙනුවෙන් පෙනී සිටින නීතිඥ වී. එස්. නිරන්ජන් මාධ්‍යවේදීන් හමුවේ කියා සිටියේ චෙම්මනි සමූහ සුසාන සංකිර්ණයෙන් ඊයේ දිනයේ අළුතින් මිනිස් හිස් කබල් පහක් මතු කරගත් බවයි.

“අළුතින් හිස් කබල් පහක් සොයාගෙන තිබෙනවා. මෙම දින තුන තුළ හිස් කබල් 20 ක් සොයා ගෙන තිබෙනවා. හිස් කබල් 2 ක් කැණලා අද ගොඩ ගත්තා. “

අපරාධයක් සිදුවූ ස්ථානයක් ලෙස අධිකරණය විසින් නම් කර තිබෙන සිත්තුපාත්ති සමුහ සුසානයෙන් මතු කරගත් මිනිස් ඇට සැකිලි 85 අතුරින් ඇටසැකිලි 67 ක් ජුලි 23 වැනිදා වන විට ගොඩ ගෙන ඇති බව නීතිඥවරයා වැඩි දුරටත් සදහන් කරයි.

ශ්‍රී ලංකාවෙන් මේ තාක් හමු වු විශාලතම සමුහ සුසානය ලෙස සැලකෙන්නේ බාල දරුවන් 28ක ඇතුළු මිනිස් සිරුරු කොටස් 376 ක් සොයාගත් මන්නාරම සතොස සමුහ මිනී වලයි.

2013 වසරේ දී මාතලේ රෝහල ආසන්නයේ භූමියකින් මළසිරුරු 155 ක් ගොඩගන්නා ලද අතර එය ශ්‍රී ලංකාවෙන් හමුවු දෙවැනියට විශාලතම සමුහ සුසානය ලෙස සැලකේ. ශ්‍රී ලංකාවේ සිව්වැනියට විශාලතම සමුහ සුසානය ලෙස දැන් පිලිගැනෙන්නේ එම වසරේදීම මිනිස් සිරුරු 82 ක අස්ථි කොටස් ගොඩ ගත් මන්නාරම, තිරුකේතීස්වරම් සමූහ මිනී වලයි.

කොක්කුතොඩුවායි සමුහ සුසානයෙන් පුද්ගලයන් 52 දෙනකුට අයත් අස්ථි කොටස් ගොඩ ගැනිමෙන් අනතුරුව කැනීම් කටයුතු අවසන් කළ අතර මීට වසරකට ඉහත දී කොළඹ වරාය දක්වා දිවෙන අලුතින් ඉදිවෙන අධිවේගි මාර්ගයේ ඉදිකිරිම් කටයුතු සඳහා පොළොව හාරමින් සිටියදී 2024 ජුලි මස 13 වැනිදා පළමු වරට ඇටකටු හමුවු කොළඹ වරායේ පිහිටි පැරණි ලේකම් කාර්යාලය පරිශ්‍රයෙන් ගොඩ ගත් සම්පුර්ණ මිනිස් අස්ථි ගණන මේ වන තෙක් ප්‍රකාශයට පත් වී නැත.

කෙසේ නමුත් මෙම සියළු සමුහ සුසාන හමුව තිබුනේ අහම්බයෙන් මිස රජයේ විමර්ශනවලින් නොවේ.

ඉකුත්දා පොලිස් බාධක මැද්දේ වෘත්තීය සමිති නායකයන් හා බහුජන සංවිධාන එක්ව කොළඹ පැවැත්වූ විරෝධතාවකදී රජයට බලකර සිටියේ රටපුරා විසිරී ඇති බවට විශ්වාස කෙරෙන විස්සකට අධික සමූහ මිනීවළවල් සම්බන්ධ විමර්ශන ආරම්භ කරන ලෙසයි.