රජයට අයිති ඉඩම් පර්චසයක් රු 28 බැගින් විකුණලා – කෝප් කමිටුවෙදි අනාවරණය වෙයි!

ඉඩම් ප්‍රතිසංස්කරණ කොමිෂන් සභාව විසින් රජයට අයත් ඉඩම් අක්කර 25ක් රුපියල් 101,109ක මුදලකට විකුණා ඇති බව ද හෙළි වී ඇත.

පුද්ගලික දේපළ වෙළෙඳාම් සමාගමක් විසින් මෙම මිලදී ගැනීම සිදුකර ඇති අතර ගණුදෙනුව අනුව පර්චසයක මිල වී ඇත්තේ රුපියල් 28.72ක් බව කෝප් කමිටුවේදී අනාවරණය වි ඇති බවයි වාර්තා වන්නේ.

කෙසේවෙතත් අදාළ සමාගම විසින් ඉඩම් කට්ටි කිරීමෙන් පසුව පර්චසයක් රුපියල් ලක්ෂ 06 බැගින් විකුණා ඇති බවද අනාවරණය වී ඇත.

උපරිමයකට වැඩි කෘෂිකාර්මික ඉඩම් හිමි නොවන අයට විකල්ප ඉඩම් ලබා දීමට හැකියාවක් නොමැති නමුත් කොමිෂන් සභාව විසින් එවැනි අය වෙත විකල්ප ඉඩම් මුදා හැර ඇති බව මෙහිදී අනාවරණය විය.

උපරිමයකට වැඩි කෘෂිකාර්මික ඉඩම් හිමි අයෙක් නොවන තැනැත්තියකට හිමි රත්නපුර දිස්ත්‍රික්කයේ පිහිටි රාස්සගල වත්තේ අක්කර 22ක් වෙනුවට විකල්ප ලෙස ජනතා වතු සංවර්ධන මණ්ඩලයට අයත් හන්තාන වත්ත නමැති ඉඩමෙන් අක්කර 43කට වැඩි ප්‍රමාණයක් ලබා දීම පිළිබඳ මෙහිදී කරුණු අනාවරණය විය.

රාස්සගල වත්ත නමැති ඉඩමේ භුක්තිය ඉඩම් ප්‍රතිසංස්කරණ කොමිෂන් සභාවට අයත් නොවන අතර එහි භුක්තිය ජනතා වතු සංවර්ධන මණ්ඩලය සතුව තිබූ බවට එහිදී කරුණු අනාවරණය වූ අතර උපරිමයකට වැඩි කෘෂිකාර්මික ඉඩම් හිමි තැනැත්තියක නොවන අයෙකුට විකල්ප ඉඩම් ලබාදීමට කටයුතු කිරීම සම්බන්ධයෙන් ද කරුණු සොයා බැලීම මෙහිදී සිදුවිය.

එමෙන්ම, කොමිෂන් සභාව පවරා ගත් ඉඩමක් වෙනුවට හන්තාන – ඌරගල වත්තෙන් අක්කර 25ක් කෑගල්ල දිස්ත්‍රික්කයේ පුද්ගලයකුට ලබා දීම, ඔහු විසින් වෙනත් පුද්ගලයෙකුට එය ඇටොර්නි බලපත්‍රයක් මගින් පැවරීම, පසුව එම පුද්ගලයා විසින් එය දේපොළ වෙළෙඳාම් සමාගමකට පැවරීමක් පිළිබඳව ද අනාවරණය විය.

තව ද, කොමිෂන් සභාව විසින් එකී දේපොළ වෙළෙඳාම් සමාගමට 2021.07.31 වැනි දින එම අක්කර 25 රුපියල් 101,109/-කට ඔප්පුවකින් ලබා දී ඇති බවත් ඒ අනුව ඉඩමේ පර්චස් එකක වටිනාකම රුපියල් 28.72 බව සහ පසුව එම සමාගම විසින් පර්චස් එකක් රුපියල් ලක්ෂ 06 බැගින් විකුණා ඇති බව සහ එය සම්පූර්ණයෙන් ම වැරදිසහගත ගනුදෙනුවක් බව කමිටුවේදී අවධාරණය කෙරිණි.

කොමිෂන් සභාව ආරම්භ කර වසර 50ක් ඉක්ම ගොස් ඇතත් කොමිෂන් සභාව සතු ඉඩම්වල ඉඩම් සහ මායිම් හඳුනාගැනීමට සුදුසු ක්‍රමවේදයක් ක්‍රියාත්මක නොකිරීම සම්බන්ධයෙන් කාරක සභාව මෙහිදී අවධානය යොමු කළේ ය.

මායිම් හඳුනා‌ගත නොහැකි නමුත් ඉඩම හඳුනාගෙන ඇති ඉඩම් සහ ඉඩම හෝ මායිම හඳුනාගෙන නොමැති ඉඩම් සහ මායිම් හඳුනාගැනීමට කොමිෂන් සභාව සතු ඉදිරි වැඩපිළිවෙළ පිළිබඳව කමිටුව විමසා සිටි අතර එහිදී සභාපතිවරයා ප්‍රකාශ කළේ ප්‍රථම වතාවට කොමිෂන් සභාව සතු ඉඩම් පිළිබඳ ලැයිස්තුවක් මේ වනවිට සකස් කර ඇති බවයි.

ඒ අනුව, කොමිෂන් සභාව සඳහා 2026 – 2030ට අදාළ සුදුසු සංයුක්ත සැලැස්මක් සකස් කරන ලෙස ලබා දුන් නිර්දේශයට අනුව සංයුක්ත සැලැස්මක් සකස් කොට අමාත්‍යාංශයට ලබාදී ඇති බවත් එහි පිටපතක් කමිටුව වෙත ලබා දීමට කටයුතු කරන බවත් කොමිෂන් සභා සභාපතිවරයා පැවසීය.

ඉඩම් ප්‍රතිසංස්කරණ කොමිෂන් සභාවේ අධ්‍යක්ෂ ජනරාල්වරයා පත්කිරීම ඇතුළු පසුගිය කාලය තුළ සිදු කරන ලද අනීතික පත්වීම් නිවැරැදි කරන ලෙසට දෙන ලද නිර්දේශයට අනුව පත් කිරීම් සියල්ලම පිළිබඳ මූලික වාර්තා කැඳවා එම වාර්තා පරීක්ෂා කිරීමට විශේෂ කමිටුවක් පත් කළ බවත් එහි වාර්තාව කමිටුවට ඉදිරිපත් කිරීමට සති 03ක කාලයක් ලබා දෙන ලෙසත් කොමිෂන් සභාව කෝප් කමිටුවෙන් ඉල්ලා තිබේ.

කොමිෂන් සභාව විසින් සේවයේ යොදවා සිටින සේවකයන් සඳහා අර්ථසාධක අරමුදලක් පිහිටුවීම, ශුභසාධන හා විනෝද ක්‍රීඩා පහසුකම්, නිවාස හා නේවාසිකාගාර හා වෙනත් ඉඩකඩ සැපයීම සිදු කළ යුතුය යන්න පදනම්ව කොමිෂන් සභාවේ වසර 05ක් අඛණ්ඩ සේවයක් හිමි සේවකයෙකුට පර්චස් එකක් රුපියල් 1,000ක වටිනාකමට පර්චස් 20 බැගින් ලබා දීමේ ක්‍රමවේදය සම්බන්ධව ද මෙහිදී දීර්ඝ වශයෙන් සාකච්ඡා කෙරිණි.