රටතුළ ව්‍යාප්තව ඇති විෂ මත්ද්‍රව්‍ය මර්දනය කිරීම සඳහා මෙන්ම සංවිධානාත්මක අපරාධකරුවන් අත්අඩංගුවට ගැනීම සඳහා ශ්‍රී ලංකා පොලීසිය, පොලිස් විශේෂ කාර්ය බළකාය හා ත්‍රිවිධ හමුදාව එක්ව සිදුකරන විශේෂ සෝදිසි මෙහෙයුම් මාලාවේ තවත් අදියරක් ඊයේ පැවැත්විණි.
ඒ අනුව ඊයේ දිනයේදී එම ආරක්ෂක අංශවල සාමාජිකයින් 6,141 දෙනෙකු සම්බන්ධවී සිදුකළ මෙම විශේෂ මෙහෙයුමේදී පුද්ගලියින් 23,231 දෙනෙකු, වාහන 9,459 සහ යතුරුපැදි 7,019ක ප්‍රමාණයක් පරීක්ෂාවට ලක් කර තිබේ.
එම වැටලීම්වලදි මත්ද්‍රව්‍ය සම්බන්ධයෙන් පුද්ගලයින් 881 දෙනෙකු අත්අඩංගුවට ගෙන ඇති අතර අපරාදවලට සෘජු ලෙස සම්බන්ධ පුද්ගලයින් 22 දෙනෙකුද වරෙන්තුකරුවන් 389 දෙනෙකුද පොලීසිය විසින් අත්අඩංගුවට ගෙන තිබේ.
එමෙන්ම මෙම මෙහෙයුම් තුළදී නීති විරෝධී ගිනිඅවි 04ක්ද පොලිස් භාරයට ගෙන ඇත.
තවද මෙම මෙහෙයුම් අතරතුරදී රථවාහන වැරදි සම්බන්ධවද මෙහෙයුම් පුළුල් කර ඇති අතර ඒ අනුව බීමත් රියදුරන් 97 දෙනෙකුද පොලිස් අත්අඩංගුවට ගෙන තිබේ.
එමෙන්ම අපරික්ෂාකාරී ලෙස රිය ධාවනය ඇතුළු වෙනත් රථ වාහන වැරදි සම්බන්ධයෙන් පුද්ගලයින් 3,314කට නෛතික පියවර ගැනීමට පොලීසිය කටයුතු කර ඇත.
