නුවරඑළියේ අයාලේ යන පෝනියන් ගැන නගරාධිපති ගත් තීරණය මෙන්න!

නුවරඑළිය නගරයට පැමිණෙන දෙස් විදෙස් සංචාරකයින්ට මෙන්ම වාහනවලට අවහිර ලෙස අයාලේ සැරිසරන පෝනියන් අල්ලා ගාල් කිරීමට පියවර ගන්නා බව නුවරඑළිය නගරාධිපති උපාලි වනිගසේකර පවසයි.

ඔහු වැඩිදුරටත් සඳහන් කළේ පෝනියන්ගේ අයිතිකරුවන්, පෝනියන්ගෙන් ආදායමක් ලබාගැනීම පමණක් සිදුකර සතුන් රැකබලා ගැනීමක් සිදු නොකරන බවයි.

මෙ‍ම සතුන් නගරය පුරා සැරිසරමින් ආපනශාලාවලින් හා සංචාරකයින් ලබාදෙන ආහාර ගන්නා බවත්, ඇතැම් පෝනියන් රෝගාතුරව සිටින බවත්, එම සතුන් සුවපත් කිරීමට අයිතිකරුවන් කටයුතු නොකරන බවද නගරාධිපතිවරයා පැවසීය.

අයාලේ සැරිසරන පෝනියන්ගෙන් සිදුවන හිරිහැර සම්බන්ධයෙන් පොලීසියට ලැබුණු පැමිණිලි කිහිපයක් මත මෙම තීරණය ගෙන ඇත.

මෙම පෝනියන් නගරසභාව විසින් ගාල් කර ඇති බවත් නැවත අයිතිකරුවන් භාරයට ගන්නේ නම් දඩ මුදලක් ගෙවිය යුතු බවත්, භාර නොගන්නේ නම් නගර සභාව විසින් වෙන්දේසි කිරීමට කටයුතු කරන බවද නගරාධිපතිවරයා වැඩිදුරත් පවසා ඇත.