රක්ෂිත බන්ධනාගාරගත කර සිටි විශ්‍රාමික ජ්‍යෙෂ්ඨ නියෝජ්‍ය පොලිස්පති ඇප මත මුදාහරියි!

සැකපිට අත්අඩංගුවට ගෙන රක්ෂිත බන්ධනාගාරගත කර සිටි විශ්‍රාමික ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි ඇප මත මුදාහැරීමට මහනුවර මහෙස්ත්‍රාත් ශ්‍රීනාත් විජේසේකර ඊයේ (06) නියෝග කර ඇත.

විදේශ රටක සැඟව සිටින සංවිධානාත්මක අපරාධකරුවකු ලෙස හැඳින්වෙන කෙහෙල්බද්දර පද්මේ නමැත්තා තමන්ට වට්ස්ඇප් මාර්ගයෙන් තර්ජනය කළැයි අසත්‍ය පැමිණිල්ලක් කිරීමේ සිද්ධිය සම්බන්ධයෙන් ප්‍රියන්ත ජයකොඩි රක්ෂිත බන්ධනාගාර ගත කරනු ලැබීය.

මෙම නඩුව කැඳවු අවස්ථාවේ එම සැකකරු වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් කළ කරුණු දැක්වීම් සලකා බැලූ මහෙස්ත්‍රාත්වරයා රුපියල් 10,000ක මුදල් හා රුපියල් ලක්‍ෂ දෙක බැගින් වූ ශරීර ඇප බැඳුම්කර දෙකක් මත සැකකරු මුදාහැරීමට නියෝග කර ඇත.

2025.07.06 වැනිදා තමාට තර්ජනය කළ බවට ප්‍රියන්ත ජයකොඩි කර තිබූ පැමිණිල්ලක් අනුව පරීක්ෂණ පැවැත්වූ තම දෙපාර්තමේන්තුව වැඩිදුර විමර්ශන සිදුකර එක් සැකකරුවකු අත්අඩංගුවට ගත් බව අපරාධ පරීක්ෂණ දෙපාර්තමේන්තුව එහිදී මහෙස්ත්‍රාත්වරයාට දැනුම් දී ඇත.

එම සැකකරු කෙහෙල්බද්දර පද්මේ නමින් ව්‍යාජ ලෙස පෙනී සිටිමින් එසේ තර්ජනය කර ඇත්තේ ප්‍රියන්ත ජයකොඩිගේම ඉල්ලීම මත බව ද එම සැකකරු කළ පාපොච්චාරණයක් අනුව ප්‍රියන්ත ජයකොඩිව අත්අඩංගුවට ගත් බව අපරාධ පරීක්ෂණ දෙපාර්තමේන්තුව එහිදී අධිකරණයට පෙන්වා දුන්නේය.

සැකකාර ප්‍රියන්ත ජයකොඩි කොළඹ ගාලුමුවදොර ප්‍රදේශයේ පිහිටි වන් ගෝල්ෆේස් නමැති හෝටලයේදී පසුගිය මැයි මස අගභාගයේ සහ ජුනි මස මුල් සතිය ඇතුළත දිනයක හමුවී එම ඉල්ලීම කර ඇති බවට එම සිද්ධිය සම්බන්ධයෙන් සැකපිට අත්අඩංගුවට ගත් පළමු සැකකරු ලබාදුන් ප්‍රකාශය පිළිබඳව සී.සී.ටී.වී. දර්ශන ලබාගෙන සිදුකරන බවත් මේ දක්වා එම විමර්ශන අවසන් වී නොමැති බවත් අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කර ඇත.

ඒ හේතුවෙන් සැකකාර ප්‍රියන්ත ජයකොඩි ඇප මත මුදාහැරීම සම්බන්ධයෙන් විරුද්ධ වන බව අපරාධ පරීක්ෂණ දෙපාර්තමේන්තුව කියා සිටියේය.

අපරාධ පරීක්ෂණ දෙපාර්තමේන්තුව පවසන එම කරුණු කිසිසේත්ම විය නොහැකි බවත් මැයි 20 වැනිදා වකුගඩු ශල්‍යකර්මයකට ලක්වූ සිය සේවාදායකයා එම කාලය තුළ රෝහලේ නේවාසිකවත් පසුව වෛද්‍ය නිර්දේශ මත නිවසේ රැදි සිටිය බව අධිකරණයට පැවැසූ ජනාධිපති නීතිඥ සම්පත් මෙන්ඩිස් සිය කරුණු දැක්විම සනාථ කිරීම සඳහා අවශ්‍ය වෛද්‍ය වාර්තා ඇතුළු ලේඛන ද අධිකරණයට ඉදිරිපත් කර ඇත.

ඒ අනුව එම කරුණු සලකා බැලූ මහෙස්ත්‍රාත්වරයා එම ඇප නියෝග කර ඇත.

අපරාධ පරීක්ෂණ දෙපාර්තමේන්තුව විසින් පසුගිය මස 29 වැනිදා මහබාගේ පිහිටි නිවසේ සිටියදී ප්‍රියන්ත ජයකොඩි අත්අඩංගුවට ගෙන තිබූ අතර රෝගී තත්ත්වය උත්සන්න වීම නිසා රාගම ප්‍රදේශයේ පිහිටි රෝහලකට ඇතුළත් කර තිබුණි.

එම රෝහලට ගිය වැලිසර වැඩබලන නිලනොලත් මහෙස්ත්‍රාත් නීතිඥ ඉන්දික අතුරලිය, සැකකාර ප්‍රියන්ත ජයකොඩි ඊයේ දිනය දක්වා රක්ෂිත බන්ධනාගාරගත කිරීමට නියෝග කලේය.

එදින වැඩබලන මහෙස්ත්‍රාත්වරයා කරන ලද නියෝගයක් අනුව ප්‍රියන්ත ජයකොඩි ඊයේ මහනුවර මහෙස්ත්‍රාත් අධිකරණය හමුවට ඉදිරිපත් කිරීමට බන්ධනාගාර නිලධාරීන් පියවරගෙන තිබුණි.