ජාතිය අමතමින් අගමැති නරේන්ද්‍ර මෝදි පාකිස්තානයට අනතුරු අඟවයි!

ඉන්දියාවේ 79 වන නිදහස් දිනයේදී, රතු කොටුවේ සිට ජාතිය අමතමින් අගමැති නරේන්ද්‍ර මෝදි විසින් පාකිස්තානයට අනතුරු ඇඟවීමක් සිදුකර ඇති බව විදෙස් මාධ්‍යය වාර්තා කරයි.

එහිදී ඉන්දියාව ත්‍රස්තවාදීන්ට සහ ඔවුන්ට උදව් කරන අයට එකසේ සලකන බවත්, අනාගතයේදී ඉන්දීය සන්නද්ධ හමුදාවන්ගෙන් පාකිස්ථානයට තීරණාත්මක පළිගැනීම්වලට මුහුණ දීමට සිදුවනු ඇති බවත් ප්‍රකාශ කර ඇත.

ඉන්දීය හමුදාවට ප්‍රශංසා කරමින් අගමැති මෝදි, මෙහෙයුමෙන් පකිස්ථානයට දැඩි හානි සිදු වූ බව පැවසූ අතර, හානිය පිළිබඳ නව සාක්ෂි දිනපතා මතුවෙමින් ඇති බව අවධාරණය කර ඇත. එමෙන්ම ඉන්දියාව පකිස්ථානයේ ඉස්ලාමාබාද්හි න්‍යෂ්ටික තර්ජනයට යටත් නොවන බව ඔහු නැවත තහවුරු කළේය.

ඉන්දු ගංගා ජලයෙන් රටට හිමි කොටස සඳහා ඉන්දියාවට සහ එහි ගොවීන්ට තනි අයිතිය ඇති බව පැවසූ අගමැති මෝදි, පාකිස්තානය සමඟ ඇති ඉන්දු ජල ගිවිසුම අසාධාරණ සහ ඒකපාර්ශ්වික එකක් ලෙස හංවඩු ගසා ඇත.

දශක ගණනාවක් පැරණි ගිවිසුම ඉන්දියානු කෘෂිකර්මාන්තයට දැවැන්ත හානියක් සිදුකර ඇති බවත්, ඉන්දියාවෙන් ආරම්භ වන ගංගාවලට ඔවුන්ගේ සතුරන්ගේ කෙත්වලට ජලය සැපයීමට ඉඩ සලසන බවත්, ඉන්දියානු භූමිය සහ ගොවීන් වියළිව තබන බවත් අගමැති මෝදි පැවසීය.

ඉන්දියාවට අයත් ජලය භාවිතා කරනු ලබන්නේ ඉන්දියාවේ ගොවීන් සඳහා පමණක් බවත්, ඔවුන්ගේ අයිතිය අහිමි කරන කිසිදු විධිවිධානයක් නොඉවසන බවත් සඳහන් කළ අගමැති මෝදි මෙම ගිවිසුම පිළිගත නොහැකි බවද පැවසීය.

ලෝක බැංකුවේ මැදිහත්වීම යටතේ 1960 දී අත්සන් කරන ලද මෙම ගිවිසුම මගින් ඉන්දියාව සහ පාකිස්තානය අතර ඉන්දු සහ එහි අතු ගංගා බෙදා ගැනීම පාලනය කර ඇති අතර ඉන්දියාවේ ගොවීන් දශක ගණනාවක් තිස්සේ සිතාගත නොහැකි පාඩු විඳදරාගත් බව මෝදි පවසා ඇත.

වත්මන් ඉන්දිය රජය තවදුරටත් එවැනි තත්වයක් නොපිළිගන්නා බවද මෙහිදී අවධාරණය කර ඇත.