රතන හිමි සහ තුසිත හල්ලොලුව අත්අඩංගුවට ගැනීමට වරෙන්තු නිකුත් කරයි!

පූජ්‍ය අතුරලියේ රතන හිමියන්ට සහ ජාතික ලොතරැයි මණ්ඩලයේ හිටපු විධායක අධ්‍යක්ෂ තුසිත හල්ලොලුව යන අයට එරෙහිව අත්අඩංගුවට ගැනීමේ වරෙන්තු නිකුත්කර ඇත.

ඒ කොළඹ අපරාධ කොට්ඨාශයේ (CCD) සහ පොලිසියේ ඉල්ලීමකට අනුවයි.

නුගේගොඩ මහේස්ත්‍රාත් අධිකරණය සහ කොළඹ මහේස්ත්‍රාත් අධිකරණය විසින් මෙම නියෝග නිකුත් කර තිබේ.

අපේ ජනබල පක්ෂයේ මහ ලේකම් වේදිනිගම විමලතිස්ස හිමියන් පැහැරගෙන ගොස් උන්වහන්සේ බිය ගන්වා 2020 වසරේදී එම පක්ෂයට ලද ජාතික ලැයිස්තු මන්ත්‍රී ධූරය ලබා ගැනීම සම්බන්ධයෙන් සැකපිට අතුරලියේ රතන හිමියන් අත්අඩංගුවට ගැනීමට කොළඹ අපරාධ කොට්ඨාශයේ නිලධාරීන් උන්වහන්සේ වැඩ සිටින රාජගිරියේ සඳහම් සෙවන වෙත 07 වන දින රාත්‍රීයේ ගොස් තිබුණි.

එහි යන විට උන්වහන්සේ එහි රැඳී සිට නැති අතර, ජංගම දුරකථනය පවා අක්‍රීය කර සැඟව සිටින බවට කොළඹ අපරාධ කොට්ඨාශය සඳහන් කලේය.

මෙම සිදුවීම සම්බන්ධයෙන් හිටපු ජනාධිපති ගෝඨාභය රාජපක්ෂ මෙන්ම සේවයෙන් නෙරපා සිටින පොලිස්පති දේශබන්දු තෙන්නකෝන් ප්‍රශ්න කිරීමට නියමිතයි.

මෙම පැහැරගැනීම සහ ජාතික ලැයිස්තු මන්ත්‍රී ධූරය සම්බන්ධයෙන් දේශබන්දු තෙන්නකෝන්ගේ සම්බන්ධයක් ගැන පැමිණිල්ලෙහි පැහැදිලිවම සඳහන් වන බව කොළඹ අපරාධ කොට්ඨාශයේ තොරතුරු අනාවරණය කරගෙන තිබේ.

වසර 05 කට පමණ පෙර සිදුවූ මෙම සිදුවීම සම්බන්ධයෙන් මේ වන විට සැකකරුවන් දෙදෙනෙක් අත්අඩංගුව‍ට ගෙන ඇති අතර පළමු සැකකරු අත්අඩංගුවට ගන්නේ පසුගිය ජූලි 20 වෙනිදායි.

මීට අමතරව තුසිත හල්ලොලුව සහ ඔහුගේ නීතීඥවරයා මෝටර් රථයකින් ගමන් කරමින් සිටියදී එම රථයට වෙඩිතබා එහි තිබූ ලිපිගොනුවක් පැහැරගෙන යාමේ සිද්ධියක් සම්බන්ධයෙන් පොලීසිය විමර්ශන සිදුකරන අතර ඔහුව අත්අඩංගුවට ගැනීම සඳහා ඔහු පදිංචිව සිටින නිවසට කොළඹ අපරාධ කොට්ඨාසයේ පොලිස් කණ්ඩායමක් ගොස් ඇතත් ඔහු නිවසේ සිටියේ නැත.

එම වෙඩිතැබීමේ සිද්ධියට අදාළ වෙඩික්කරු, යතුරුපැදිකරු සහ ඊට ආධාර අනුබල දුන් සැකකරුවන් කිහිපදෙනෙකුම පොලීසිය විසින් අත්අඩංගුවට ගෙන ඇති අතර ඔවුන්ගෙන් ප්‍රශ්න කිරීමේදී සහ තාක්ෂණික විමර්ශනවලදී හෙළිවූ කරුණු අනුව තුසිත හල්ලොලුව අත්අඩංගුවට ගැනීමට කටයුතු කෙරෙමින් පවතියි.