ශ්‍රී ලංකා – ඉතාලි ද්වීපාර්ශ්වික සහයෝගිතාව තවදුරටත් ශක්තිමත් කරමින් ඉතාලියේ විදේශ කටයුතු සහ ජාත්‍යන්තර සහයෝගිතාව පිළිබඳ නියෝජ්‍ය ඇමැතිනි මරියා ට්‍රිපොඩි මහත්මිය දෙදින නිල සංචාරයක් සඳහා අද (03) ශ්‍රී ලංකාවට පැමිණීමට නියමිතව තිබේ.
එළැඹෙන 05 දා දක්වා ඒ මහත්මිය මෙරට රැඳී සිටීමට නියමිතව තිබෙන අතර මෙය දශකයකට ආසන්න කාලයකට පසු ඉතාලියේ සිට ශ්‍රී ලංකාව වෙත සිදුකෙරෙන ඉහළම මට්ටමේ සංචාරය බව විදේශ කටයුතු අමාත්‍යාංශය පෙන්වා දෙයි.
ඇයගේ සංචාරය අතරතුරදී, විදේශ කටයුතු සහ විදේශ රැකියා නියෝජ්‍ය ඇමැති අරුන් හේමචන්ද්‍ර මහතා සමඟ එක්ව ශ්‍රී ලංකා – ඉතාලි දේශපාලන උපදේශන සමාරම්භක සැසියේ සම-සභාපතිත්වය දරනු ඇති බවද දේශපාලන උපදේශන යාන්ත්‍රණයක් ස්ථාපිත කිරීම පිළිබඳ අවබෝධතා ගිවිසුමක් අත්සන් කිරීමට නියමිත බවද එම අමාත්‍යාංශය සඳහන් කරයි. ඒ ඔස්සේ දෙරට අතර සංවාදය සඳහා ව්‍යුහගත රාමුවක් සපයනු ඇති අතර දෙරට අතර රාජ්‍යතාන්ත්‍රික සබඳතා 1952 වසරේදී ස්ථාපිත කෙරිණි.
නියෝජ්‍ය ඇමැතිනි ට්‍රිපොඩි මහත්මිය, අගමැතිනි ආචාර්ය හරිනි අමරසූරිය මෙණෙවිය හමුවීමට සහ විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා සමඟ සාකච්ඡා පැවැත්වීමට ද නියමිතව තිබේ.