ශ්‍රී ලංකා ක්‍රිකට් කණ්ඩායම ඉතිහාසයේ පළමු වරට අද (3) සිම්බාබ්වේදී විස්සයි20 තරගයකට එක්වෙයි.
දෙපිල අතර තරග 3කින් සමන්විත විස්සයි20 තරගාවලියේ දිවා තරගයක් (ප.ව.1.30) ලෙස පැවැත්වෙන පළමු තරගය අද මෙරට වේලාවෙන් පස්වරු 5.00ට හරාරේ ක්‍රීඩා සමාජ ක්‍රීඩාංගණයේදී ආරම්භ වීමට නියමිතය.
විස්සයි20 තරග ඉතිහාසයේ මේ දෙපිල ද්විපාර්ශ්වික තරගාවලියකින් එක්වන දෙවැනි අවස්ථාව මෙය වන අතර, පසුගිය වසරේ කොළඹ ආර්. ප්‍රේමදාස ක්‍රීඩාංගණයේදී පළමු වරට දෙපිල විස්සයි20 තරගාවලියක් ක්‍රීඩා කළේය. එහිදී තරග 3කින් සමන්විත තරගාලිය 2-1ක් ලෙස ජය ගැනීමට ශ්‍රී ලංකාවට හැකි විය.
ඉන් පෙර මේ දෙපිල තෙවරක් හමුව ඇති අතර, 2010 සහ 2012 විස්සයි20 ලෝක කුසලානයේදී සහ ඉන් පෙර 2008 වසරේ කැනඩාවේ පැවති සිවුකොන් තරගාවලියේදීය. ඒ අනුව දෙපිල විස්සයි20 තරග බිමේ 6 වරක් හමුවූ අතර, ඉන් තරග 5ක් ජය ගැනීමට ශ්‍රී ලංකා පිල සමත් වෙද්දී සිම්බාබ්වේ පිල එක් තරගයක් ජය ගෙන තිබේ.
මේ දෙපිල විස්සයි20 තරග බිමට පිවිසෙන්නේ අවසන් වරට ක්‍රීඩා කළ තරගාවලි පරාජය වීමෙන් පසුවය. ශ්‍රී ලංකා පිල බංග්ලාදේශ හමුවේත් සිම්බාබ්වේ පිල නවසීලන්තය හමුවේත් අවසන් තරගාවලියන් පරාජයට පත් විය. කෙසේ වෙතත් මේ තරගාවලිය දෙපිලටම වැදගත් වී තිබේ. ඒ ශ්‍රී ලංකා පිල මේ තරගාවලියෙන් අනතුරුව ආසියානු කුසලාන විස්සයි20 ක්‍රිකට් තරගාවලියට එක්විය යුතුය.
සිම්බාබ්වේ පිලට මේ මස අගදී ලබන වසරේ පැවැත්වෙන විස්සයි20 ලෝක කුසලාන තරගාවලියට සුදුසුකම් ලැබීමේ අප්‍රිකානු කලාපීය තරගාවලියට ක්‍රීඩා කළ යුතුව තිබේ. එබැවින් සිය කණ්ඩායම් පිළිබඳ තක්සේරුවක් ලබා ගැනීමත් කණ්ඩායමේ සංයුතිය පිළිබඳ අවබෝධයක් ලබා ගැනීමටත් මේ තරගාවලිය යොදා ගත හැකි බැවිණි.
මේ තරගාවලියේදී වනිඳු හසරංග නොමැති වීමෙන් දඟ පන්දු යවන ක්‍රීඩක දුෂාන් හේමන්ත ශ්‍රී ලංකා සංචිතයට එක්වන සිටින අතර, නවක ක්‍රීඩක 20 හැවිරිදි විශේන් හැළඹගේ ද ඇතුළත්ව සිටිති. වසර 3කට පසු කමිල් මිෂාර සංචිතයට කැඳවා ඇති අතර, ඔහු 2022 වසරේ ජාත්‍යන්තර විස්සයි20 වරම් ලැබූ අතර, එම වසරේ තරග 3ක් ක්‍රීඩා කිරීමෙන් පසු යළි මේ තරගාවලියට එක් කර තිබේ. එමෙන්ම නුවනිඳු ප්‍රනාන්දු සහ දුෂ්මන්ත චමීර ද සංචිතයට කැඳවීමට පියවර ගෙන ඇත.
මේ අතර විස්සයි20 තරගාවලිය සඳහා සිම්බාබ්වේ සංචිතය ඊයේ ප්‍රකාශයට පත් කළ අතර, සිකන්දර් රාසාගේ නායකත්වයෙන් යුත් සංචිතයට කඩුලු රකින බ්‍රෙන්ඩන් ටේලර් ද ඇතුළත් කර තිබේ. ජාත්‍යන්තර තරග තහනමෙන් මිදීමෙන් අනතුරුව වසර 4කට පසු එක්දින පිලට කැඳවූ ටේලර් ජාත්‍යන්තර විස්සයි20 තරග 45ක් ක්‍රීඩා කර ඇති අතර, අවසන් වරට විස්සයි20 තරගයක් ක්‍රීඩා කර ඇත්තේ 2021 වසරේ අප්‍රේල් 25 වැනිදාය. කෙසේ වෙතත් එක්දින තරගාවලියේදී ඔහුට වැඩි යමක් කිරීමට අවස්ථාවක් නොලැබිණි.
ආබාධයක් හේතුවෙන් එක්දින තරගාවලිය අහිමිවූ නායක ක්‍රේග් අර්වින්ට මේ තරගාවලියත් අහිමි වී තිබේ. අර්වින් වෙනුවට එක්දින තරගාවලියට නායකත්වය දුන් ෂෝන් විලියම්ස් ද මේ සංචිතයට කැඳවා ඇති අතර, ඔහු විස්සයි20 තරගයකට එක් වන්නේ වසරකට පසුවය.
ශ්‍රී ලංකා විස්සයි20 සංචිතය: චරිත් අසලංක (නායක), පැතුම් නිශ්ශංක, කුසල් මෙන්ඩිස්, කුසල් ජනිත්, නුවනිඳු ප්‍රනාන්දු, කමිඳු මෙන්ඩිස්, කමිල් මිෂාර, විශේන් හැළඹගේ, දසුන් ශානක, දුනිත් වෙල්ලාලගේ, චාමික කරුණාරත්න, මහීෂ් තීක්ෂණ, දුෂාන් හේමන්ත, දුෂ්මන්ත චමීර, බිනුර ප්‍රනාන්දු, නුවන් තුෂාර, මතීෂ පතිරණ.
සිම්බාබ්වේ විස්සයි20 සංචිතය – සිකන්දර් රාසා (නායක), බ්‍රයන් බෙනට්, රයන් බර්ල්, බ්‍රැඩ් එවන්ස්, ට්‍රෙවර් ග්වාන්ඩු, ක්ලයිව් මැඩන්ඩේ, ටිනොටෙන්ඩා මපෝසා, තඩිවානාෂේ මරුමානි, වෙලින්ටන් මසකඩ්සා, ටෝනි මුන්යොංගා, ටෂිංගා මුසෙකිවා, බ්ලෙසින් මුසරබානි, ඩියෝන් මයර්ස්, රිචඩ් න්ගරාවා, බ්‍රෙන්ඩන් ටේලර්, ෂෝන් විලියම්ස්.