ගාසා තීරයේ සටන් විරාමයක් සඳහා එක්සත් ජාතීන්ගේ ආරක්ෂක මණ්ඩලය විසින් ඉදිරිපත් කරන ලද යෝජනාවක් එක්සත් ජනපදය සිය නිෂේධ බලය භාවිත කරමින් ප්‍රතික්ෂේප කර ඇති බව විදෙස් මාධ්‍ය වාර්තා කරයි.
ඒ, ආරක්ෂක මණ්ඩලයේ අනෙකුත් සාමාජිකයින් 14 දෙනාම යෝජනාවට පක්ෂව ඡන්දය ලබා දී තිබු පසුබිමකයි.
සියලුම ප්‍රාණ ඇපකරුවන් නිදහස් කිරීම මෙන්ම ගාසා තීරයට මානුෂීය ආධාර රැගෙන යෑමට පනවා ඇති සීමාවන් ඉවත් කිරීම යන ඉල්ලීම්ද යෝජනාවට ඇතුළත්ව තිබි ඇත.
ගාසා තීරයේ සටන් විරාමයක් සඳහා එක්සත් ජාතීන්ගේ ආරක්ෂක කවුන්සිලය ඉදිරිපත් කළ කෙටුම්පත, එක්සත් ජනපදය විසින් මෙලෙස ප්‍රතික්ෂේප කරමින් සිය බලය පාවිච්චි කරනු ලැබුවේ පස්වන වරටයි.
ඒ, ඊශ්‍රායලය වෙත සිය සහය පළ කරමිනි.
කෙටුම්පත ප්‍රතික්ෂේප කරමින් එක්සත් ජාතීන්ගේ එක්සත් ජනපද තානාපතිනි ඩොරති ෂියා පැවසුවේ හමාස් සංවිධානය හෙළා දැකීමට අසමත් වන, ඔවුන්ට නිරායුධ වී ගාසා තීරයෙන් ඉවත් වන ලෙස ඉල්ලා නොසිටින කිසිදු පියවරකට සහයෝගය නොදක්වන බවයි.
එක්සත් ජාතීන්ගේ සංවිධානය විසින් හමාස් කණ්ඩායම තවමත් ත්‍රස්තවාදී සංවිධානයක් ලෙස හඳුනාගෙන නොතිබීම අසාධාරණ බවත්, ඊශායල- ගාසා ගැටුම් ආරම්භ වූ දිනයේ පටන් ඊශ්‍රායලයට සිය ආරක්ෂාව තහවුරු කර ගැනීමය අයිතියක් තිබේ’ යන පැහැදිලි ස්ථාවරය එක්සත් ජනපදය විසින් දරන බවත් ඇය ප්‍රකාශ කර තිබුණි.
ගාසා තීරයේ මානුෂීය අර්බුදය දරුණු වී ඇති පසුබිමක එක්සත් ජාතීන්ගේ ආරක්ෂක මණ්ඩලය ඉදිරිපත් කළ මෙම කෙටුම්පත සම්මත කර ගැනීමට නොහැකි වී ඇත.
එක්සත් ජාතීන්ගේ සංවිධානයට අනුව සති 11ක් පුරා පැවති ගාසා තීරයට ආධාර බෙදා දීමට එරෙහිව ඊශ්‍රායලය විසින් පැනවූ තහනමෙන් පසුව මිලියන දෙකකට අධික ජනතාවක් සාගත තත්වයකට මුහුණ දීමේ අවදානමකින් පෙළෙන බව සදහන් වේ.
ගාසා තීරයේ මානුෂීය ආධාර බෙදා දීමේ කටයුතු මේ වන විට එක්සත් ජනපදය සහ ඊශ්‍රායලය එක්ව ක්‍රියාත්මක කරන Gaza Humanitarian Foundation (GHF) නමැති ගාසා මානුෂීය පදනම විසින් සිදු කෙරෙන අතර එම පදනම විසින් පවත්වාගෙන යන ආධාර බෙදා හැරීමේ ස්ථානවලට ප්‍රහාර එල්ල වීමේ සිදුවීම්ද පසුගීය දිනවල වාර්තා විය.
