තමන්ට V8 වර්ගයේ සුපිරි ජීප් රථයක් ලබා දෙන ලෙස සෞඛ්‍ය රාජ්‍ය ඇමැතිනි විශේෂඥ වෛද්‍ය සීතා අරඹේපොළ සෞඛ්‍ය අමාත්‍යාංශයෙන් ඉල්ලීමක් කර ඇති බව වාර්තා වනවා.
ඒ මේ වන විටත් ඇයට ලබා දී ඇති බෙන්ස් වර්ගයේ මෝටර් රථය සහ බී. එම්. ඩබ්ලිව්. වර්ගයේ මෝටර් රථය ට අමතරවයි.
රාජ්‍ය ඇමැතිවරිය ඉල්ලා සිටින V8 වර්ගයේ සුපිරි රථය මේ වනවිට පරිහරණය කරනු ලබන්නේ සෞඛ්‍ය අමාත්‍යාංශයේ අතිරේක ලේකම් වරියක වන විශේෂඥ වෛද්‍ය ලක්ෂ්මි සෝමතුංගයි.
කෙසේ වෙතත් අතිරේක ලේකම්වරිය එම ජීප් රථය ලබා දීමට අකැමැති වී ඇති බවද සෞඛ්‍ය අමාත්‍යාංශ අභ්‍යන්තර ආරංචි මාර්ග සඳහන් කරනවා.
පසුගිය මැයි මස නවවැනිදා පැවති ආණ්ඩුව ඉවත්වීමෙන් පසු සෞඛ්‍ය අමාත්‍යාංශය සඳහා කැබිනට් අමාත්‍යවරයකු පත් කළ ද රාජ්‍ය අමාත්‍යවරයකු පත් නොකළ අතර හිටපු රාජ්‍ය අමාත්‍යවරුන් භාවිත කළ මෝටර් රථ අමාත්‍යංශයේ අතිරේක ලේකම්වරු දෙදෙනකු භාවිතයට ගෙන තිබෙනවා.
