අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරිවරයෙක් සහ පොලිස් පරීක්ෂකවරයෙක් හෙට (11) මැඩගස්කරය බලා පිටත්ව යෑමට නියමිතව ඇත.
ඒ පසුගියදා මැඩගස්කරයේදී අත්අඩංගුවට ගැනුණු ‘හරක් කටා’ සහ කුඩු සළිඳු නමැති මත්ද්‍රව්‍ය ජාවාරම්කරුවන් දෙදෙනා මෙරටට රැගෙන ඒමට අවශ්‍ය කටයුතු සිදුකිරීම වෙනුවෙනි.
නඳුන් චින්තක නොහොත් “හරක් කටා” සහ සළිඳු මල්ෂික නොහොත් “කුඩු සළිඳු” නමැති මෙරට ප්‍රබල මත්ද්‍රව්‍ය ජාවාරම්කරුවන් දෙදෙනා ඇතුළු 8දෙනෙක් පසුගිය 01 වනදා මැඩගස්කාරයේ ඉවාටෝ ගුවන් තොටුපොළේ දී අත්අඩංගුවට පත්වී තිබුණි.
විදෙස් මාධ්‍ය සඳහන් කර තිබුණේ අත්අඩංගුවට පත් පිරිස අතර හරක් කටාගේ බිරිඳ ද වන බවය.
ඇය මැලගාසි ජාතික තැනැත්තියක් බවට අනාවරණය වී තිබේ.
විදෙස් මාධ්‍ය සඳහන් කර ඇත්තේ හරක් කටා ඇතුළු 05 දෙනෙක් පසුගිය පෙබරවාරි 12 වනදා එරට ගුවන්තොටුපොළක් වෙත පැමිණ ඇත්තේ පෞද්ගලික ජෙට් යානයකින් බවය.
අත්අඩංගුවට පත්වෙන අවස්ථාවේ හරක් කටා පෙනී සිට ඇත්තේ සුපිරි ධනවතෙක් ලෙසිනි.
