වසර 4කට වැඩි කාලයක් අපරාධ පරීක්ෂණ දෙපාර්තමේන්තුව භාරයේ සහ රක්ෂිත බන්ධනාගාරගත කර සිටි සහරාන්ගේ බිරිඳ වන ෆාතිමා හාදියා දැඩි ඇප කොන්දේසි මත අද මුදා හැරුණා.
ඒ කල්මුණේ මහාධිකරණය මගින්.
පුලස්තීනී රාජේන්ද්‍රන් නොහොත් සාරා සම්බන්ධයෙන් තොරතුරු වසන් කරමින් පාස්කු ප්‍රහාරය සිදු කිරීමට ඉඩ සැලසූ බවට ෆාතිමා හාදියාට එරෙහිව කල්මුණේ මහාධිකරණය හමුවේ නඩු පවරා තිබුණා.
නඩුව අද කල්මුණේ මහාධිකරණ විනිසුරු ජෙයරාම් ට්‍රොස්කි හමුවේ කැඳවනු ලැබූ අවස්ථාවේ ඇප ඉල්ලීම පිළිබඳ නියෝගය ලබා දෙමින් සැකකාරිය ඇප මත මුදා හැරුණා.
එහිදී අධිකරණය රුපියල් 25,000ක මුදල් ඇපයක්, රුපියල් ලක්ෂ 25 බැගින් වු ශරීර ඇප 2ක් නියම කෙරුණා.
සැකකාරියට මෙන්ම ඇපකරුවන්ට ද විදෙස් ගමන් තහනමක් පනවනු ලැබුවා.
සෑම ඉරිදාවකම දහවල් 12ත් පස්වරු 4ත් අතර අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට ද අධිකරණය සැකකාරියට නියම කළා.
