සමගි ජනබලවේගයේ (සජබ) නියෝජිතයින් පිරිසක්, පාර්ලිමේන්තු මන්ත්‍රී රාජිත සේනාරත්න සමග සාකච්ඡාවක් පවත්වා තිබෙනවා.
සමගි ජනබලවේගයේ මහලේකම් පාර්ලිමේන්තු මන්ත්‍රී රංජිත් මද්දුම බණ්ඩාරගේ නිවසේ ඊයේ (11) පැවති මෙම හමුවට එම පක්ෂයේ පාර්ලිමේන්තු මන්ත්‍රීවරුන් වන ලක්ෂ්මන් කිරිඇල්ල, කබීර් හෂීම්, තිස්ස අත්තනායක ද එක්වුණා.
එහිදී ආණ්ඩුවට එක්වන බවට මාධ්‍ය තුළ පළ වී ඇති වාර්තා පිළිබඳව එම මන්ත්‍රී කණ්ඩායම රාජිත සේනාරත්න මන්ත්‍රීවරයාගෙන් කරුණු විමසා තිබෙනවා.
පාර්ලිමේන්තු මන්ත්‍රී රාජිත සේනාරත්න එහිදී ප්‍රකාශ කර ඇත්තේ පක්ෂයක් ලෙස එකතුවීම හැර තමන් තනිවම ආණ්ඩුවට එක්නොවන බවයි.
එසේ නම්, මාධ්‍ය සාකච්ඡාවක් කැඳවා ඒ සම්බන්ධයෙන් ප්‍රකාශයක් සිදුකරන ලෙස අදාළ මන්ත්‍රීවරුන් රාජිත සේනාරත්නට දැනුම් දී තිබෙනවා.
ඊට රාජිත සේනාරත්න මන්ත්‍රීවරයා කැමැත්ත පළ කළ බවයි අප කළ විමසීමක දී පාර්ලිමේන්තු මන්ත්‍රී තිස්ස අත්තනායක කියා සිටියේ.
