පක්ෂ, පාට, ජාති, ආගම් භේද පසෙකලා නව දැක්මකින් රට වෙනුවෙන් ඉදිරියට යෑමට මෙවර අලුත් අවුරුද්ද නව ඇරඹුමක් කරගත යුතු බව ජනාධිපති රනිල් වික්‍රමසිංහ ප්‍රකාශ කරනවා.
අලුත් අවුරුදු පණිවුඩයක් නිකුත් කරමින් ජනාධිපතිවරයා සඳහන් කරන්නේ මීලඟ අලුත් අවුරුද්ද අදටත් වඩා සමෘද්ධිමත් කර ගැනීමට අප උත්සාහ කළ යුතු බවයි.
පසුගිය වසරේ අලුත් අවුරුද්ද එළැඹෙද්දී සැවොම දැවැන්ත අර්බුදයකට මුහුණ දී සිටි බවත්, මේ අලුත් අවුරුද්දේ කිසියම් සහනදායී පරිසරයක් උදා වී ඇති බවත් ජනාධිපතිවරයා වැඩිදුරටත් ප්‍රකාශ කරනවා.
සියලු දෙනා එක්ව, එක මවකගේ දරුවන් මෙන් ඉදිරියට යෑම තුළින් ප්‍රාර්ථනා මුදුන්පත් කරගත හැකි බවද ජනාධිපති රනිල් වික්‍රමසිංහගේ අලුත් අවුරුදු පණිවුඩයේ සඳහන්.
මේ අතර, රට මුහුණ දුන් ආහාර සහ ආර්ථීක අර්බුදය හමුවේ ගොවි ජනතාව රට බත බුලතින් සරි කරන්නට අභියෝගාත්මකව කළ මෙහෙය, මේ අලුත් අවුරුද්දේ කෘතවේදිව සිහිපත් කළ යුතු බව, අග්‍රාමාත්‍ය දිනේෂ් ගුණවර්ධන මහතා පවසයි.
ඒ, අලුත් අවුරුදු සුබ පැතුම් පණිවුඩයක් නිකුත් කරමින් ය. අග්‍රාමාත්‍යවරයා පෙන්වා දෙන්නේ නවමු සංකල්පවලින් පෝෂිත අලුත් අවුරුද්දක් ආරම්භ කළ යුතු බවයි.
ආහාර සුරක්ෂිතතාව, සකසුරුවම, අපේකම සහ සමගිය යළි යළි අකුරු කරන්නට අවශ්‍ය නොවන බව සඳහන් කරන අග්‍රාමාත්‍යවරයා, ඒ වෙනුවෙන් අවශ්‍ය වන්නේ ක්‍රියාත්මකභාවය බවද අදාළ පණිවුඩයේ වැඩිදුරටත් දක්වා තිබෙනවා.
මේ අතර සෞභාග්‍ය සම්පන්න අනාගතයක් උදෙසා අධිෂ්ඨානශීලිව පෙළ ගැසීමට සමස්ත පුරවැසියන්ට ශක්තිය ලැබේවායී තමන් ප්‍රාර්ථනා කරන බව විපක්ෂ නායක සජිත් ප්‍රේමදාස සිය අලුත් අවුරුදු පණිවුඩයෙන් සඳහන් කළා.
ජනතාවගේ සාමාන්‍ය ජීවන තත්ත්වයට අභියෝග එල්ල වුණු අන්ධකාර සමය නිමාවිය යුතු බව ද ඔහු ප්‍රකාශ කරනවා.
වසර කිහිපයක් මුළුල්ලේ ලක්වාසී ජනතාවට අලුත් අවුරුද්ද උදා වූයේ අභියෝග රැසක් මධ්‍යයේ වුවත්, සමස්ත ජනතාවගේ එකම බලාපොරොත්තුව වන්නේ රටට, ජනතාවට සෞභාග්‍යය හා නීරෝගීමත් බව ප්‍රාර්ථනා කිරීම බව ද විපක්ෂ නායකවරයා පවසයි.
2023.04.14
