කුරුණෑගල හිටපු නගරාධිපතිවරයා වන තුෂාර සංජීව විතාරණ මහතාගේ පාලන කාලයේදී සිදු වූ වැරදි සම්බන්ධයෙන් චෝදනා 11කට වැරදිකරු වී තිබෙනවා.
වයඹ පළාත් ආණ්ඩුකාර වසන්ත කරන්නාගොඩ මහතාගේ නියමයෙන් පත් කරන ලද ඒක පුද්ගල පරීක්ෂණ කොමිසම නිකුත් කර ඇති වාර්තාවට අනුව ඔහුට එරෙහිව ඉදිරිපත් කරන ලද චෝදනා 18 කින් චෝදනා 11 කටම වැරැදිකරු බවට තීන්දු කර තිබෙන්නේ.
වයඹ පළාත් ආණ්ඩුකාර වසන්ත කරන්නාගොඩ මහතා අති විශේෂ ගැසට් නිවේදනයක් ඊයෙ (08) නිකුත් කරමින් සඳහන් කළේ එම කොමිසම විසින් ලබාදී ඇති නිගමනවලට අනුව තුෂාර සංජීව විතාරණ මහතා 2022.12.31 වන දින සිට ක්‍රියාත්මක වන පරිදි කුරුණෑගල මහ නගර සභාවේ නගරාධිපති ධූරයෙන් හා සභික ධූරයෙන් පහ කළ අයකු වශයෙන් සැලකිය යුතු බවයි.
මහ නගර සභා ආඥා පනත යටතේ 2020 වසරේ අයවැය සම්පාදන හා බලාත්මක කිරීමේ නියෝගවල විධිවිධාන ක්‍රියාත්මක වීම හේතුකොටගෙන තුෂාර සංජීව විතාරණ මහතා 2022.12.31 වන දින සිට ක්‍රියාත්මක වන පරිදි කුරුණෑගල මහ නගර සභාවේ නගරාධිපති ධූරයෙන් ඉල්ලා අස්වූවාසේ සලකන බවද එම ගැසට් නිවේදනයේ සඳහන්.
වයඹ පළාතේ හිටපු ආණ්ඩුකාරවරුන් වන පේෂල ජයරත්න සහ ඒ.ජේ.එම්.මුසම්මිල් යන මහත්වරුන් මෙම කොමිසම හමුවේ සාක්ෂි ලබාදී තිබෙනවා.
