කළුතර නගරයේ ලැගුම්හලක පස්මහල් ගොඩනැගිල්ලකින් ඇද වැටී මිය ගිය දහසය හැවිරිදි පාසල් සිසුවිය ගේ මරණය සම්බන්ධයෙන් කළුතර දකුණු පොලීසිය විසින් අත්අඩංගුවට ගෙන අධිකරණයට ඉදිරිපත් කළ කාන්තාවක් මැයි 15 වැනිදා තෙක් රිමාන්ඩ් බන්ධනාගාර ගතකරන ලෙස කළුතර ප්‍රධාන මහේස්ත්‍රාත් නීතා හේමමාලි හාල්පන්දෙනිය නියෝග කළාය.
මෙසේ රිමාන්ඩ් බන්ධනාගාර ගත කරන ලද්දේ කළුතර,කටුකුරුන්ද ගාලුපාරේ පදිංචි වඩුගේ ඉනෝකා කුමාරි යන අයයි.
දකුණු කළුතර, ප්‍රධාන වීදිය, අංක 402 ලිපිනයේ පිහිටි සිසිලියන් චෝක් හෝටලය පිටුපස රේල්පාරේ වැටී මියගොස් සිටි දහසය හැවිරිදි පාසල් සිසුවිය එදින ලැගුම්හලට ඇතුළු වන මොහොතේ, පිළිගැනීමේ නිළධාරිණිය ලෙස සැකකාර කාන්තාව කටයුතු කර ඇති බව පොලිසිය අධිකරණයට කරුණු වාර්තා කරන ලදී.
එම සැකකාර කාන්තාව එදින අදාළ හෝටලයේ පිළිගැනීමේ නිළධාරිනිය ලෙස කටයුතු කරමින් මියගොස් ඇති දැරියගේ අනන්‍යතාවය තහවුරු කරගැනීමකින් තොරව වෙනත් වැඩිහිටි තරුණියකගේ හැඳුනුම්පතක් ලබාගෙන දැරියට ලිංගිකව කටයුතු සඳහා පරිශ්‍රය ලබාදීම සම්බන්ධයෙන් චෝදනා නගා තිබුණි.
අධිකරණය විසින් නඩුව ලබන මැයි 15 දා යළි කැඳවීමට නියමිත ය.
