පාර්ලිමේන්තු මන්ත්‍රිවරයකුට මෙතෙක් වසරකට ලබාදුන් රුපියල් ලක්ෂ දෙකක රක්ෂණ ප්‍රතිලාභය රුපියල් මිලියනයක් දක්වා ඉහළ දැමීමට රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන ඇමැතිවරයා ලෙස අගමැති දිනේෂ් ගුණවර්ධන කැබිනට් මණ්ඩලයට යෝජනා කර තිබේ.
ඒ අනුව, මේ වසරේ අගෝස්තු මස 20 වැනිදා සිට පාර්ලිමේන්තු මන්ත්‍රිවරුන්ට මෙම නව ප්‍රතිලාභය හිමිවිය යුතු බව අගමැතිවරයා යෝජනා කර තිබේ.
පාර්ලිමේන්තු මන්ත්‍රිවරුන්ට දැනට වසරකට රුපියල් ලක්ෂ දෙකක රක්ෂණාවරණයක් හිමිවුවද, වෛද්‍ය පහසුකම් සඳහා වර්තමානයේ අයකරන ගාස්තු සහ ඖෂධවල මිල ගණන් සලකා බලා දැනට පවතින රක්ෂණාවරණයේ සීමාව කිසිසේත්ම ප්‍රමාණවත් නොවන බැවින් එය මිලියනයක් දක්වා වැඩි කළ යුතු බවට අගමැතිවරයා ඉකුත් වසරේ (2022) නොවැම්බර් මස 21 වැනිදා කැබිනට් මණ්ඩලයට යෝජනා කර ඇත. ඊට අනුමැතියද ලැබී තිබේ.
මෙලෙස රක්ෂණාවරණය ප්‍රමාණවත් නොවීම මත ඇතැම් අවස්ථාවලදී පාර්ලිමේන්තු මන්ත්‍රිවරුන්ට ජනාධිපති අරමුදලින්ද වෛද්‍යාධාර සලසාදී තිබේ.
ඉකුත් වසරේ (2022) අගෝස්තු මස 20 වැනිදා සිට මේ වසරේ (2023) අප්‍රේල් මස 30 වැනිදා දක්වා වූ කාලසීමාව තුළදී පාර්ලිමේන්තු මන්ත්‍රීවරුන්ගෙන් රක්ෂණ බිල්පත් 57ක් ලැබී ඇති අතර, ඒ සඳහා ගෙවීමට නියමිත මුදල රුපියල් අනූහත් ලක්ෂ හැත්තෑ පන්දහස් හාරසිය හැට එකකි. (9,775,461.64)
