පසුගියදා ගුවන් තොටුපොළ අතිවිශේෂ අමුත්තන්ගේ පර්යන්තය හරහා හොර රහසේ රත්රන් හා ජංගම දුරකථන තොගයක් ගෙනැවිත් නීතියේ රැහැනට කොටුවූ මන්ත්‍රී අලි සබ්‍රි රහීම්ට හිමි අතිවිශේෂ අමුත්තන්ගේ විශේෂ වරප්‍රසාද අහෝසි කිරීමට අවශ්‍ය නීති පියවර ගන්නා මෙන් කථානායක මහින්ද යාපා අබේවර්ධන මහතා පාර්ලිමේන්තු නිලධාරීන්ට උපදෙස් ලබාදී තිබෙනවා.
මෙම සිද්ධියෙන් අනතුරුව දඩ මුදල් ගෙවා ඔහු නිදහස් වූ අතර පාර්ලිමේන්තුවේ පක්ෂ නායකයන් කථානායකවරයාගෙන් ඉල්ලා සිටියේ මන්ත්‍රීවරයාට එරෙහිව වහාම පියවර ගන්නා ලෙසයි.
මේ අනුව කරුණු අධ්‍යයනය කිරීමෙන් අනතුරුව කථානායකවරයා අදාළ බලධාරීන්ට උපදෙස් ලබාදී ඇත්තේ මන්ත්‍රීවරයාට ගුවන් තොටුපොළේදී හිමිවන අතිවිශේෂ අමුත්තන්ගේ වරප්‍රසාද අහෝසි කිරීමට අදාළව නීති හා උපදෙස් ලබාගෙන සිවිල් ගුවන් සේවා දෙපාර්තමේන්තුවේ මතය ද විමසා අවශ්‍ය පියවර ගන්නා ලෙසයි.
