විදේශ කටයුතු අමාත්‍ය අලි සබ්රි මහතා නිල විදේශ සංචාර සඳහා රුපියල් කෝටි 5 කට වැඩි මුදලක් වැය කර ඇති බවට අනාවරණ වී තිබෙනවා.
ප්‍රවීණ මාධ්‍යවේදී රිෆ්ත් අලි විසින් තොරතුරු දැනගැනීම පනත යටතේ යොමු කළ අයදුම් පත්‍රයක් හරහායි මෙම කරුණු හෙළි වී ඇත්තේ.
විදේශ කටයුතු අමාත්‍යවරයා සංචාර 7 ක් සඳහා පමණක් මෙම මුදල වැය කර ඇති බව සඳහන්. අලි සබ්රි මහතා පසුගිය ජූලි මස 22 වනදා සිය ධුරයේ දිවුරුම් දෙනු ලැබුවේ ජනාධිපති රනිල් වික්‍රමසිංහ මහතා ඉදිරියේයි.
දිවුරුම් දුන් දිනයේ සිට ස්විට්සර්ලන්තය, අමෙරිකාව, බංගලාදේශය, සෞදි අරාබිය ඇතුළුව රටවල් හතක සංචාරය කර තිබෙනවා.
මෙහි දී අමෙරිකාවට සහ ස්විට්සර්ලන්තයට අවස්ථා දෙකක දී ගොස් ඇති බව සඳහන්. සැප්තම්බර් සහ නොවැම්බර් මාසවල දී විදේශ සංචාර දෙක බැගින් සිදු කර ඇති බවයි වාර්තා වන්නේ.
මෙම සංචාර සඳහා 05 කෝටි 19 ලක්ෂ 47 දහස් 32ක් වියදම් කර ඇති බවයි අදාළ වාර්තාවේ දැක්වෙන්නේ.
පසුගිය වසරේ පැවැති 51 වන එක්සත් ජාතීන්ගේ මානව හිමිකම් සැසිවාරය සඳහා සිදු කළ සංචාරයේ එක් කෝටි හතළිස් පන්ලක්ෂ 21,892 ක් වැය කර ඇති බව සඳහන්.
එම සැසිවාරය සඳහා හය දෙනෙකුගෙන් සමන්විත කණ්ඩායමක් ස්විට්සර්ලන්තය බලා ගොස් තිබුණා.
විදේශ අමාත්‍යවරයා සංචාරය සඳහා වැය කළ මුදල් සම්බන්ධයෙන් පසුගිය පෙබරවාරි මස 28 වනදා යොමු කළ අයදුම්පත්‍රයට පසුගිය මැයි මස 16 වනදා තොරතුරු ලබා දීමටයි කටයුතු කර ඇත්තේ.
කෙසේ වෙතත් පසුගිය මාර්තු පළමුවැනිදා සිට අද (17) බ්‍රිතාන්‍ය, ස්වීඩන්, දකුණු කොරියාව සහ දකුණු අප්‍රිකාව යන රටවලට නිල සංචාරයන් සිදු කර තිබෙනවා.
