අංගොඩ ජාතික මානසික සෞඛ්‍ය විද්‍යායතනයේ ප්‍රතිකාර ලබමින් සිටි රෝගියෙකු පහරකෑමකට ලක්ව මියයාමේ සිද්ධියක් සම්බන්ධයෙන් ඔහුගේ පවුලේ ඥාතීන් සිදුකළ පැමිණිල්ලකට අනුව මුල්ලේරියාව පොලිසිය විමර්ශනයක් ආරම්භ කර තිබෙනවා.
මෙලෙස මියගොස් ඇත්තේ වටරැක – සමනළතැන්න ප්‍රදේශයේ පදිංචි 47 හැවිරිදි එක්දරු පියෙක්.
දීර්ඝ කාලයක සිට මානසික රෝගයකින් පෙළුණු මෙම පුද්ගලයා රෝගය උත්සන්න වීම නිසා පසුගිය 20 වනදා රෝහලට ඇතුළත් කර තිබුණා.
කෙසේ වෙතත් පසුගිය 25 වනදා අලුයම අදාල සිද්ධිය සිදුව ඇති අතර රෝහලෙන් ප්‍රකාශ කර ඇත්තේ නාන කාමරය තුළ ලිස්සා හිස වැදීමෙන් මරණය සිදුව ඇති බවයි.
කෙසේ වෙතත් දේහය මුද්‍රාතබා නිවසට එවා තිබීම හේතුවෙන් ඥාතීන්ට ඇති වූ සැකය මත ඥාතීන් මුල්ලේරියාව පොලිසියට මේ සම්බන්ධයෙන් පැමිණිල්ලි කර තිබුණා.
ඒ අනුව ඊයේ එම රෝහලේ විශේෂඥ අධිකරණ වෛද්‍ය නිලධාරි චන්න පෙරේරා පශ්චාත් මරණ පරීක්ෂණය සිදුකරනු ලැබුවා.
එහිදී තහවුරු වී ඇත්තේ මොට ආයුධවලින් පහරදී සිදුවූ බහුවිධ සංකූලතා නිසා මෙම මරණය සිදුව ඇති බවයි.
අප මේ සම්බන්ධයෙන් ජාතික මානසික සෞඛ්‍ය විද්‍යායතනයේ අධ්‍යක්ෂිකා වෛද්‍ය ධම්මිකා විජේසිංහගෙන් විමසීමක් කළා.
ඇය කියා සිටියේ සෞඛ්‍ය අමාත්‍යංශයේ අවසරයකින් තොරව මාධ්‍ය වෙත ප්‍රකාශයක් ලබාදිය නොහැකි බවයි.
