කොළඹ – කුරුණෑගල මාර්ගයේ තුල්හිරිය තැපැල් කාර්යාලය ආසන්නයේදී අද (අගෝ: 02) පෙරවරුවේ බස් රථයක් හා ප්‍රයිම් මූවර් රථයක් එකිනෙක ගැටීමෙන් අනතුරක් සිදු වී ඇති බව වරකපොල පොලිසිය පවසයි.
මෙම අනතුරෙන් එක් පුද්ගලයෙකු මිය ගොස්, 23 දෙනෙකු තුවාල ලබා වරකපොල රෝහලට ඇතුළත් කර ඇති අතර 4 දෙනෙකුගේ තත්ත්වය බරපතළ බැවින් කොළඹ ජාතික රෝහලට මාරු කර යවා තිබේ.
අනතුරට පත් වන විට බස් රථයේ මගීන් 55 දෙනෙකු ගමන් කර ඇති බව පොලිසිය සඳහන් කළේ ය.
වරකපොල පොලිසිය තවදුරටත් සඳහන් කළේ, බස් රථයේ රියැදුරුවරයාගේ අපරීක්ෂාකාරී ධාවනය හේතුවෙන් අලව්වේ සිට වරකපොල දෙසට ධාවනය වෙමින් තිබුණු ප්‍රයිම් මූවර් රථයක ගැටී බස් රථය මාර්ගය මත පෙරළී ඇති බව ය.
