2023 ලංකා ප්‍රිමියර් ලිග් තරගාවලියේ අනුග්‍රාහකයෙකු ලෙසද කටයුතු කළ MTFE ආයතනයට එරෙහිව විමර්ශනයක් ආරම්භ කර ඇති බව ශ්‍රී ලංකා මහ බැංකුව ප්‍රකාශ කරනවා.
අප කළ විමසීමකදී ශ්‍රී ලංකා මහ බැංකුව මේ බව තහවුරු කළ අතර ඔවුන් පවසා සිටියේ අදාළ ආයතනය ශ්‍රී ලංකා මහ බැංකුවේ ලියාපදිංචි සමාගමක් නොවන බවයි.
එම ආයතනය 2023 ලංකා ප්‍රිමියර් ලිග් තරගාවලියේ අනුග්‍රාහකයෙකු ලෙස ශ්‍රී ලංකා ක්‍රිකට් ආයතනය සහ අයි.පී.ජි සමාගම සමඟ ගිවිසුම් ගතව තිබූ අතර ඒ අනුව ජැෆ්නා කිංග්ස් කණ්ඩායමේ ජර්සියේ මෙම සමාගමේ ලාංජනය මුද්‍රණය කිරීමටත් තරග පැවැත්වෙන ක්‍රීඩාංගණවල ප්‍රචාරණ කටයුතු සිදු කිරීමටත් එම ආයතන කටයුතු කර තිබෙන අයුරු දක්නට ලැබුණා.
කෙසේ වෙතත් පිරමිඩ සමාගමක් ලෙස කටයුතු කරන බවට මෙම සමාගමට එරෙහිව සමාජ මාධ්‍ය ඔස්සේ දැඩි විරෝධය එල්ලවීමත් සමඟ එම සමාගම එල්.පී.එල්. අනුග්‍රහකත්වය ඉවත් කරන්නට ශ්‍රී ලංකා ක්‍රිකට් ආයතනය සහ අයි.පී.ජී සමාගම පසුව කටයුතු කළා.
මේ අතර, සෘජුව හෝ වක්‍රව පිරමීඩ යෝජනා ක්‍රමවල නිරත වීමෙන් වැළකී සිටින ලෙස ශ්‍රී ලංකා මහබැංකුව විශේෂ දැනුම් දීමක් සිදුකරනවා.
පිරමීඩ යෝජනා ක්‍රම ක්‍රියාත්මක කරන වංචාකරුවන් පිළිබඳ විමර්ශනය කෙරෙමින් පවතින බවයි මහබැංකුව පෙන්වා දෙන්නේ.
ශ්‍රී ලංකාව තුළ පිරමිඩ යෝජනා ක්‍රම නීතිවිරෝධී බවද එහි සඳහන්. එසේම ශ්‍රී ලංකා මහ බැංකුව විසින් පිරමිඩ යෝජනා ක්‍රම 08ක් පිළිබඳව මාධ්‍යයන් ඔස්සේ මේවන විටත් මහජනතාව දැනුවත් කර තිබෙනවා.
- Tiens Lanka Health Care (Pvt) Ltd.
- Best Life Inte ational (Pvt) Ltd.
- Global Lifestyle Lanka (Pvt) Ltd.
- Mark-Wo International (Pvt) Ltd.
- V M L Inte ational (Pvt) Ltd.
- Fast 3Cycle International (Pvt) Ltd (F3C)
- Sport Chain App, Sports Chain ZS Society Sri Lanka
- OnmaxDT
කෙසේ නමුත් එම ලැයිස්තුවේ දැනට ක්‍රියාත්මක සියලුම පිරමිඩ යෝජනා ක්‍රම අඩංගු නොවිය හැකි බැවින් වෙනත් පිරමිඩ යෝජනා ක්‍රම ක්‍රියාත්මක කරන වංචාකරුවන් තවත් සිටිය හැකි බැවින් ශ්‍රී ලංකා මහ බැංකුව විසින් ඒවා පිළිබඳ විමර්ශනය කරමින් සිටින බවයි පවසන්නේ.
ප්‍රකට ක්‍රීඩා, ආගමික සහ විනෝදාස්වාදජනක අවස්ථා සඳහා අනුග්‍රාහකත්වය දැක්වීම මගින් ඔවුන් යහපත් පුද්ගලයන් සේ සමාජයේ පෙනී සිටීමට උත්සහ ගන්නා බව ද මහබැංකුව සඳහන් කරනවා.
පිරමීඩ යෝජනා ක්‍රමවලට සහභාගි වීම දඩුවම් ලැබිය හැකි වරදක් බැවින් ඉන් වැළකී සිටින ලෙස ඔවුන් වැඩිදුරටත් දැනුම් දෙනවා.
