රෝහල් බලධාරින්ගේ නොසැළකිලිමත්කමින් රෝගී ජීවිත අහිමි වූ පුවත් පසුගිය දින කිහිපයේදීම වාර්තා වුණා.
එවන් තවත් සිදුවීමක් අප අසන්නට ලැබුණේ අනුරාධපුර ශික්ෂණ රෝහලෙන්.
රෝහල් බලධාරින්ගේ නොසැළකිලිමත්කම හේතුවෙන් දරු ප්‍රසූතියකදී බිළිදෙකු බිම වැටී ළදරු දැඩි සත්කාර ඒකකයේ ප්‍රතිකාර ලැබූ දරුවෙකු මියගොස් ඇති බවට එම රෝහලෙන් වාර්තා වුණා.
පසුගිය 10 වනදා රැඹෑව, කල්ලංචිය ප්‍රදේශයේ පදිංචි ටී. ඒ. තක්ෂිලා උදයංගනී නැමැති මෙම කාන්තාව දරු ප්‍රසූතිය සඳහා පළමුවෙන් ඇතුළත් කර තිබුණේ කල්ලංචිය රෝහලටයි. පසුව හදිසි තත්ත්වයේ සිටි ඇය පසුව අනුරාධපුර ශික්ෂණ රෝහලට මාරුකර යවා ඇති අතර එහිදීයි මෙම සිදුවීම වී ඇත්තේ.
එහිදී දින තුනක පමණ අනුරාධපුර ශික්ෂණ රෝහලේ ළදරු දැඩි සත්කාර ඒකකයේ ප්‍රතිකාර ලබමින් සිටියදී අදාළ බිළිදා අද උදෑසන ජීවිතක්ෂයට පත්ව තිබෙනවා.
බිළිදාගේ දෙමාපියන් චෝදනා කරන්නේ රෝහල් බලධාරින්ගේ නොසැළිමත්කම හේතුවෙන් දරු ප්‍රසූතියේදී බිළිඳා එලෙස බිම වැටී ජීවිතක්ෂයට පත්වූ බවයි. මේ පිළිබඳව අප අනුරාධපුර ශික්ෂණ රෝහලේ නියෝජ්‍ය අධ්‍යක්ෂවරයාගෙන් විමසීමක් කළ අතර ඔහු කියා සිටියේ මෙය සති 31 ක් වයසැති බිළිදෙකුගේ නොමේරු දරු ප්‍රසූතියක් බවත් බිළිදා බිම වැටී ඔලුව වැදීම සම්බන්ධයෙන් පරීක්ෂණයක් ආරම්භ කර ඇති බවයි.
මේ අතර ගම්පහ රෝහලේදී ආසාත්මිකතාවයක් හේතුවෙන් මියගිය රෝගියාට භාවිත කළ සෙෆ්ටසිඩීම් නැමති ප්‍රතිජීවක එන්නත ගම්පහ දිස්ත්‍රික්කය තුල භාවිතය තාවකාලිකව අත්හිටුවා තිබෙනවා.
කෙසේ වෙතත් එම එන්නත මුළුමනින්ම භාවිතයෙන් ඉවත් කරන්නේ ද යන්න ඒ සම්බන්ධයෙන් කැඳවූ විශේඥ වාර්තාව ලැබීමෙන් පසුව තීරණය කරන බවයි සෞඛ්‍ය අමාත්‍යාංශය ප්‍රකාශ කළේ.
සෞඛ්‍ය අමාත්‍ය කෙහෙළිය රඹුක්වැල්ල සදහන් කළේ සිද්ධිය සම්බන්ධයෙන් කඩිනම් වාර්තාවක් ලබාදෙන ලෙස තමන් නිලධාරින්ට නියෝග කර ඇති බවයි.
