අත් පා සහ හිස කපා වෙන් කර ඝාතනය කළ මුල්ලේරියාව තෝමස් චොන්ගම පදිංචිව සිටි ප්‍රදීපා ද සිල්වා (52) ගේ ඝාතනයට සම්බන්ධ සැකකාර ව්‍යාපාරිකයාගේ මෝටර් රථය නුවරඑළිය ප්‍රදේශයේ තිබී සොයා ගැනීමට පොලිස් විමර්ශන නිලධාරීන්ට හැකි වී තිබේ. සුධීර වසන්ත (57) නැමැති සියඹලාපේ ප්‍රදේශයේ පදිංචි මෙම ව්‍යාපාරිකයා සහ ප්‍රදීපා පසුගිය 27 දා උදෑසන අවසන් වරට ඔහුගේ වාහනයේ ගමන් කරන ආකාරය සී.සී.ටී.වී කැමරා පද්ධතියේ සටහන්ව ඇති ආකාරය සම්බන්ධයෙන් වැඩි දුර විමර්ශනය කිරීමේ දී ඔහු සිද්ධිය වූ දිනට පසුදාම (28) සිය නිවස කුලිියට දී අතුරුදහන් වි තිබිණි.
ඔහුට අයත් වසා දැමූ නිවසක ඝාතනයට සම්බන්ධ සැක සහිත සාධක හමුවීමත් එදිනම අත්සහ ගෙල රහිත කාන්තා මළ සිරුරක් සපුගස්කන්ද කොට්ටුන්න වැවෙන් හමුවීමත්, එම සිරුර අතුරුදහන් වූ ප්‍රදීපාගේ බව ඥාතීන් විසින් හඳුනා ගැනීමත් සමග ඝාතනයේ ඉදිරි තොරතුරු අනාවරණය කරගැනීමට සැකකරු සොයා යෑම අත්‍යාවශ්‍ය වූයේය.
අතුරුදහන් වූ ව්‍යාපාරිකයාගේ මෝටර් රථය නුවරඑළියෙන් හමුවන්නේ ඒ අතරය.
දැනට වාර්තාවන තෙරතුරු අනුව මෙම ව්‍යාපාරිකයා සහ ඝාතනයට ලක්වූ ප්‍රදීපා අතර වයසර 20ක පමණ කාලයක් තිස්සේ ඉතා සමීප සම්බන්ධයක් තිබී ඇත.
සුධීරත් විවාහකයෙකි. ඔහුටද දරුවන් දෙදෙනකු සිටින බවත්, ප්‍රදීපාට සුධීර මිල මුදල් ගේදොර ඉඩකඩම් පවා දී ඇති බවත් හෙළි වී ඇත.
ඇය ඝාතනය වීමත් මේ මුදල් ගනුදෙණු අතර ප්‍රශ්නත් අතර සම්බන්ධතාවයක් ඇතැයි පොලිසිය සැක කරයි. ඝාතනය වූ ප්‍රදීපාගේ සිරුරේ කොටස් සම්බන්ධව පශ්චාත් මරණ පරීක්ෂණයකින් මිස නිශ්ඡිත තොරතුරක් ප්‍රකාශ කළ නොහැකි බව පොලිස් මාධ්‍ය ප්‍රකාශකවරයා කීවද විමර්ශන කණ්ඩායම් අනුමාන කරන්නේ මේ දිනවල අධික වර්ෂාව හේතුවෙන් ගංගා ඇළ දොළවල ජල මට්ටම ඉහළ ගොස් ඇති නිසා සිරුරේ කොටස් ජලයට දමා තිබුණා නම් ඒවා සොයා ගැනීම අපහසු වනු ඇති බවය.
මේ වනවිට පොලිස් කණ්ඩායම් තුනක් සැකකාර ඝාතකයා සොයා විමර්ශන ආරම්භ කර තිබේ. අතුරුදහන් වූ ව්‍යාපාරිකයාගේ වාහනය රැගෙන එන්නට මහාබාගේ පොලිසියේ කණ්ඩායමක්ද නුවරඑළියට ගොස් ඇත.
මේ වන විට ප්‍රදීපාගේ දේහය රාගම මහරෝහලේ මෘත ශරීරාගාරයේ තබා ඇත. මහර වැඩ බලන මහේස්ත්‍රාත් සමන් විදානපතිරන විසින් ඉකුත් සිකුරාදා (29) දහවල් ඝාතනය සිදුවී ඇති බවට සැක කරන නිවෙස හා මළ සිරුර හමු වූ ස්ථානයට පැමිණ ස්ථානීය පරික්ෂණයක් සිදු කර ඇත.
ඒ මළ සිරුරේ හිස හා අත්පා සොයාගැනීම සදහා විමර්ශන කටයුතු තවදුරටත් සිදු කරගෙන යන හෙයින් ඇයගේ මළ සිරුරේ පශ්චාත් මරණ පරික්ෂණය පැවැත්වීමට තව දින කීපයක් ගත වන බව පොලිසිය කියයි.
