මහරගම අපේක්ෂා රෝහලේ විකිරණ විද්‍යා තාක්ෂණවේදීන්ගේ සංගමය තුන්වන දිනටත් ක්‍රියාත්මක කරන අකුරට වැඩ කිරීමේ වෘත්තිය ක්‍රියාමාර්ගය හේතුවෙන් ප්‍රතිකාර කටයුතු සඳහා පැමිණි රෝගීන් තවදුරටත් අපහසුතාවට පත්ව සිටිනවා.
අමතර රාජකාරි සදහා සිදුකරන ගෙවීම් පිළිබද එකඟතා කඩවන අයුරින් මහරගම අපේක්ෂා රෝහලේ අධ්‍යක්ෂකවරයා කටයුතු කරන බව පවසමිනුයි රජයේ විකිරණ විද්‍යා තාක්ෂණවේදීන්ගේ සංගමය මෙම වෘත්තිය ක්‍රියාමාර්ගය පෙරේදා (05) ආරම්භ කරනු ලැබුවේ.
විකිරණ තාක්ෂණවේදින් පස්වරු 04න් පසු ප්‍රතිකාර නොකරන බවට දන්වමින් රෝහලේ දැන්වීම් පුවරුද ප්‍රදර්ශනය කර ඇති බව වාර්තා වේ.
කෙසේ වෙතත් ඉතා දුරබැහැර ප්‍රදේශවල සිට මහරගම අපේකෂා රෝහලට පැමිණෙන රෝගීන් විශාල සංඛ්‍යාවකට අදත් ප්‍රතිකාර ලබාගැනීමට නොහැකිවීමෙන් ඔවුන් දැඩි දුෂ්කරතාවන්ට පත්වුණා.
මේ අතර කුරුණෑගල ශික්ෂණ රෝහල අක්‍රිය වී ඇති සී.ටී ස්කෑන් යන්ත්‍රය වෙනුවට ගෙන්වූ යන්ත්‍රය ඊයේ දිනයේදී ශ්‍රී ලංකා රේගුවෙන් නිදහස් කිරීමට කටයුතු කළ බව මුදල් රාජ්‍ය අමාත්‍ය ෂෙහාන් සේමසිංහ අද (07) පාර්ලිමේන්තුවේදී ප්‍රකාශ කළා.
ඒ සම්බන්ධයෙන් අද රාජ්‍ය අමාත්‍ය ශාන්ත බණ්ඩාර පාර්ලිමේන්තුවේදී ප්‍රශ්න කළ අතර ඊට පිළිතුරු ලබාදෙමිනුයි මුදල් රාජ්‍ය අමාත්‍ය ෂෙහාන් සේමසිංහ මේ බව කියා සිටියේ.
