මාලිගාවත්ත ශ්‍රී සද්ධර්ම මාවතේ මහල් නිවාස සංකීර්ණයේ නිවාස 100 ක පමණ ජල සැපයුම අද (13) පෙරවරුවේ විසන්ධි කර තිබේ.
මෙලෙස ජල සැපයුම විසන්ධි කිරීමෙන් එහි පදිංචිකරුවෝ දැඩි අපහසුතාවට පත්ව සිටිති.
ජාතික නිවාස සංවර්ධන අධිකාරිය සහ දුම්රිය දෙපාර්තමේන්තුව යටතේ පාලනය වන එම නිවාසවලට ජල සැපයුම සම්බන්ධයෙන් පැවති ජල කාන්දුවක පාඩුවක් එම නිවාසවල පංචිකරුවන්ගේ බිලට එකතු කර එයට ප්‍රමාද ගාස්තුවක් ද එකතු කිරීමෙන් මෙම තත්ත්වය උද්ගතව තිබේ.
මෙම ප්‍රමාද ගාස්තු එකතු කිරීමත් සමඟ ජල ගාස්තුව ලක්‍ෂ ගණන් වූ බව එහි පදිංචිකරුවෝ පවසති.
පදිංචිකරුවන්ගේ ඉල්ලීමෙන් අනතුරුව අදාළ බිල්වලින් සැළකිය යුතු ප්‍රමාණයක් අඩු කර තිබුණත්, ප්‍රමාද ගාස්තුව කපාහැර නොමැති බව පදිංචිකරුවන් වැඩිදුරටත් පවසති.
