කන්දකාඩු පුනරුත්ථාපන මධ්‍යස්ථානයෙන් රැඳවියන් පිරිසක් පලා යාමට අදාළ සිදුවීම සම්බන්ධයෙන් විමර්ශනයක් සිදුකිරීමට පංච පුද්ගල කමිටුවක් පත්කර තිබෙනවා.
සිද්ධිය සම්බන්ධයෙන් පරීක්ෂණ පවත්වා අවශ්‍ය නිර්දේශ ලබාගැනීම සඳහායි අධිකරණ බන්ධනාගාර හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ජනාධිපති නීතීඥ විජේදාස රාජපක්ෂ විසින් මෙම කමිටුව පත්කර ඇත්තේ.
ඊට අදාළ පරීක්ෂණ හා නිර්දේශ ඇතුළත් වාර්තාව සති 3ක් ඇතුළත ලබාදෙන ලෙසට ද අමාත්‍යවරයා උපදෙස් ලබා දී තිබෙනවා.
මෙම කමිටුවේ සභාපතිවරයා ලෙස හිටපු ශ්‍රේෂ්ඨාධිකරණ විනිසුරු හෙක්ටර් යාපා පත් කර ඇති අතර, අනෙකුත් සාමාජිකයින් වන්නේ මහජන ආරක්ෂක අමාත්‍යාංශයේ පාලන හා පොලිස් අතිරේක ලේකම් එම්.එස්.පී. සූරියප්පෙරුම, අධිකරණ බන්ධනාගාර හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ පාලන ලේකම් ආර්.එස්. හපුගස්වත්ත, එම අමාත්‍යාංශයේ අතිරේක නීති ලේකම් පියුමන්ති පීරිස් සහ ආරක්ෂක අමාත්‍යාංශයේ අතිරේක ලේකම් සමන් දිසානායක බවයි සඳහන් වන්නේ.
