යාපනයේ තෙලිප්පලෙයි ආපන ශාලා හිමියෙකු ගවමස් වෙනුවට බලු මස් අලෙවි කොට අති බවට ඇති වී තිබෙන සැකයක් මත මල්ලාකම් මහේස්ත්‍රාත්වරයා එම ආපන ශාලා හිමිකරුට රුපියල් 65000 ක දඩයක් නියම කොට ආපන ශාලාව වසා දමන ලෙස තෙලිප්පලෙයි මහජන සෞඛ්‍ය පරීක්ෂකවරයාට ඊයේ (20 ) නියෝග කොට තිබේ.
අධිකරණයට ඉදිරිපත් කොට තිබූ මස් සාම්පලය රජයේ රස පරීක්ෂකවරයා වෙත යවා ඒ සම්බන්ධයෙන් වාර්තවක් හැකි ඉක්මනින් ලබා ගෙන අධිකරණයට ඉදිරිපත් කරණ ලෙස නියෝග කළ මහේස්ත්‍රාත්වරයා එම වාර්තාව ලැබීමෙන් පසුව මේ සම්බන්ධයෙන් නඩු විභාගයක් සිදු කරණ බවද දන්වා සිටියේය.
යාපනයේ ප්‍රාදේශීය මාධ්‍යවේදියෙකු රාත්‍රී ආහාරයට ගැනීම පිණිස මෙම ආපන ශාලාවෙන් රුපියල් 500 කට ගවමස් පීරිසියක් ලබා ගෙන ඇත.
ඔහු එම මස් නිවසට රැගෙන ගොස් ආහාරයට ගැනීමට සූදානම් වූ අවස්ථාවේදී මස් කැබලි දෙකක බල්ලෙකුගේ ලෝම වලට සමාන ලෝම පිරුණු මස් කබලි දෙකක් තිබී ඇත.
ඔහු ආහාර ගැනීම නවතා රාත්‍රියේම මහජන සෞඛ්‍ය පරීක්ෂකවරයා සොයා ගොස් ඔහුට මස් සාම්පලය ඉදිරිපත් කොට තිබේ.
එම නිලධාරියා තවත් නිලධාරීන් පිරිසක් සමග අදාල ආපන ශාලාව වෙත ගොස් එය පරීක්ෂා කිරීමේදී එහි අලෙවි කිරීමට තිබූ මස් නරක් වී ඇති බවත් මිනිස් ආහාරයට එම මස් නුසුදූසු බවත් පෙනී ගොස් ඇත.
ඒ අනුව මස් සාම්පල් අත් අඩංගුවට ගත් මහජන සෞඛ්‍ය පරීක්ෂකවරු එම ආපනශාලා හිමියා පසු දින අධිකරණයට ඉදිරිපත් කොට තිබේ.
එම ආපනශාලාවේදී ගව මස් වෙනුවට අලෙවි කලේ බලු මස් බවට යාපනයේ ප්‍රාදේශීය මාධ්‍යවේදියා විසින් කරන ලද ප්‍රකාශය අධිකරණය හමුවට ඉදිරිපත් කිරීමෙන් පසුව එම මස් සාම්පල ගවමස්ද එසේත් නො මැති නම් බලු මස්ද යන්න නිගමනය කිරීමට රජයේ රස පරීක්ෂකවරයාගේ වාර්තාවක් කැඳවා ඇත.
එම වාර්තාව ලැබෙන තුරු ආපනශාලාව වසා දැමීමට නියෝග කොට ඇති මහේස්ත්‍රාත්වරයා එම වාර්තව ලැබීමෙන් පසුව ආපන ශාලා හිමියාට එරෙහිව නඩුවක් පවත්වා ගෙන යාමටද තීන්දු කොට තිබේ.
