සෛල ප්‍රතිකාරයක් තුළින් දියවැඩියා රෝගය සුව කිරීමේ නව ක්‍රමවේදයක් චීනයේ පර්යේෂණ කණ්ඩායමක් විසින් සොයාගෙන තිබෙනවා.
විදෙස් මාධ්‍ය සඳහන් කළේ ෂැංහයි – චැංෂෙන්ග් සහ රෙන්ජි යන රෝහල්වල වෛද්‍ය කණ්ඩායමක් විසින් මෙම වැඩි දියුණු කරන ලද සෛල ක්‍රමවේදය සොයාගෙන ඇති බවයි.
සවුත් චයිනා මෝනිං පෝස්ට්හි වාර්තාවකට අනුව, තෝරාගත් දියවැඩියා රෝගියෙකුට 2021 වසරේ ජූලි මාසයේදී සෛල බද්ධ කිරීමක් සිදු කර ඇති අතර සති එකොළහක් ඇතුළත, ඔහුට ඉන්සියුලින් ලබාදීමක් අවශ්‍ය නොවූ බව සඳහන්.
ඔහු 2022 වසරේ සිට ක්‍රමයෙන් දියවැඩියා රෝගය සඳහා ලබාගන්නා ඖෂධ නවතා දමා ඇති අතර, මේවන විට එම රෝගියා ඉන්සියුලින් රහිතව ජිවත් වන බව සවුත් චයිනා මෝනිං පෝස්ට්හි වාර්තාවේ සඳහන්.
බ්‍රිතාන්‍ය කොලොම්බියා විශ්වවිද්‍යාලයේ මහාචාර්යවරයෙකු වන තිමෝති කීෆර් මෙම අධ්‍යයනය අගය කරමින් කියා සිටියේ දියවැඩියාව රෝගය පාලනය සඳහා වූ මෙම නව සෛල චිකිත්සාව සැලකිය යුතු දියුණුවක් සනිටුහන් කරන බවයි.
