මහනුවර අධිකරණ සංකීර්ණයේ අද (02) විභාග කිරීමට නියමිතව තිබූ සියලු නඩු කටයුතු කල් තැබීමට තීරණය කර තිබෙනවා.
ඒ, එම සංකීර්ණය තුළ බෝම්බයක් ඇති බවට අසත්‍ය තොරතුරක් පැතිර යාම හේතුවෙන්.
ඒ අනුව එම සියලු නඩු විභාග ලබන 16 වැනිදා දක්වා කල් තැබීමටයි පියවරගෙන ඇත්තේ.
අද පෙරවරු 10.00ට පමණ මහනුවර අධිකරණ සංකීර්ණය තුළ බෝම්බයක් ඇති බවට පොලිස් හදිසි ඇමතුම් ඒකකයට දුරකථන ඇමතුමක් ලැබී තිබුණා.
ඒ හේතුවෙන් පොලිසිය වහාම ක්‍රියාත්මක වී යුද හමුදා බෝම්බ නිෂ්ක්‍රීය අංශය සහ විශේෂ කාර්ය බළකා බෝම්බ නිෂ්ක්‍රීය අංශය එක්ව අධිකරණ සංකීර්ණය තුළ සිටි සියලු දෙනා ඉවත් කර පරීක්ෂා කළ බව සඳහන්.
කෙසේ වෙතත් කිසිදු බෝම්බයක් ඇති බවට තොරතුරු හෙළි නොවූ බවයි අප වාර්තාකරු සඳහන් කළේ.
අදාළ ව්‍යාජ ඇමතුම ලබා දුන් බවට සැකකෙරෙන පුද්ගලයෙකු අත්අඩංගුවට ගෙන ඇති බව ද පොලිසිය සඳහන් කළා.
සිද්ධිය සම්බන්ධයෙන් වැඩිදුර විමර්ශන ක්‍රියාත්මකයි.
අද දින මෙම අධිකරණ සංකීර්ණයේ නඩු 16ක් පමණ විභාග කිරීමට නියමිතව තිබූ බව සඳහන්.
