එක්සත් ජාතික පක්ෂයේ දඹුල්ල ආසනයේ මෙහෙයුම් කාර්යාලය ඉදිරිපිට තිබු පුවරු කිසියම් පිරිසක් විසින් කඩා දමමින් මැතිවරණ ප්‍රචණ්ඩකාරී අයුරින් ක්‍රියා කර තිබෙනවා.
මෙම කාර්යාලය පවත්වාගෙන ගොස් ඇත්තේ, දඹුල්ල මහ නගර සභාවේ හිටපු මංත්‍රිනි මායා පාදෙණිය මහත්මියගේ නිවස තුළය.
මෙසේ හානි කර ඇත්තේ, ජනාධිපති රනිල් වික්‍රමසිංහ මහතාගේ හා දඹුල්ල ආසන සංවිධායකගේ රුව සහිතව ඉදිකර තිබු පුවරුවලටයි.
අමාත්‍ය හරීන් ප්‍රනාන්දු මහතා එම ස්ථානයට ගොස් නිරීක්ෂණය කර ඇති අතර එම තත්වය පාලනය කිරීමට කටයුතු කර තිබෙනවා.
මේ විනාශය සිදු කළ කණ්ඩායම් පිළිබඳව සොයා බලා අපක්ෂපාතී පරීක්ෂණයක් සිදුකොට ඔවුන්ට වහාම නීතිමය ක්‍රියාමාර්ග ගන්නා ලෙස අමාත්‍යවරයා එහිදී පොලිසියට උපදෙස් දී ඇති අතර අභියෝගයක් බාරගත නොහැකි විපක්ෂයේ කල්ලි විසින් සිදු කරන මෙවැනි බියගුළු ක්‍රියාමාර්ග තුළින් ප්‍රදර්ශනය වන්නේ විපක්ෂය තුළ ඇති බංකොලොත් බව සහ පරාජිත ස්වභාවය යැයි එහිදී අමාත්‍යවරයා පැවසීය.
මේ පිළිබදව දඹුල්ල පොලිසියට පැමිණිලි කර ඇති අතර සිද්ධිය පිළිබදව දඹුල්ල පොලිසිය පරික්ෂණ පවත්වනු ලබනවා.
