මේ වනවිට මේ වසරේ රත්නපුර දිස්ත්‍රික්කයෙන් ඩෙංගු රෝගීන් 2198 දෙනෙකු හඳුනාගෙන තිබෙනවා.
ඒ අනූව රත්නපුර දිස්ත්‍රික්කය තුළ ඩෙංගු වසංගත රෝගී තත්ත්වයක් ලෙස ව්‍යාප්තවීමේ අවධානමක් පවතින බව සෞඛ්‍ය අංශ විසින් අනතුරු ඇඟවීම් සිදුකර තිබෙනවා.
ඒ අනුව රත්නපුර දිස්ත්‍රික් ලේකම් වසන්ත ගුණරත්න මහතාගේ මඟපෙන්වීම යටතේ ඩෙංගු මර්ධන විශේෂ වැඩසටහනක් මෙම මස 28 රාජ්‍ය නිලධාරීන් හා ප්‍රජා සහභාගීත්වයෙන් රත්නපුර දිස්ත්‍රික්කය පුරා ක්‍රියාත්මක වීමට නියමිත බව රත්නපුර දිස්ත්‍රික් මාධ්‍ය ඒකකය පවසනවා.
මේ සඳහා රත්නපුර දිස්ත්‍රික් ලේකම් කාර්යාලය, සබරගමුව පළාත් සභාව, රත්නපුර ප්‍රාදේශීය සෞඛ්‍ය සේවා අධ්‍යක්ෂ කාර්යාලය ඇතුළු සෞඛ්‍ය අංශය, සියලු ප්‍රාදේශීය ලේකම් කාර්යාල, ශ්‍රී ලංකා පොලීසිය, අධ්‍යාපන ආයතන හා පාසල්, පළාත් පාලන ආයතන හා අනෙකුත් රාජ්‍ය ආයතන, ආගමික සිද්ධස්ථාන, රාජ්‍ය නොවන සංවිධාන හා මහජනතාවද දායකත්වය ලබාදීමට නියමිතයි.
