ජනාධිපති රනිල් වික්‍රමසිංහට සහාය පළකරන ශ්‍රී ලංකා පොදුජන පෙරමුණේ මන්ත්‍රී කණ්ඩායම එක්ව නව සන්ධානයක් පිහිටුවා ගැනීමට යෝජනා වී තිබෙනවා.
නව සන්ධානය පිහිටුවීම පිළිබඳ මූලික සාකච්ඡාවක් අරලියගහ මන්දිරයේදී ඊයේ (20) පැවැත්වුණා.
නව සන්ධානය ජන ජය පෙරමුණ ලෙස නම් කිරීමට යෝජනා වී ඇති අතර එම පිහිටුවා ගැනීමට යෝජිත නව සන්ධානයේ සභාපති ධූරය අග්‍රාමාත්‍ය දිනේෂ් ගුණවර්ධනට ලබාදීමට තීරණය කර තිබෙනවා. එහි මහලේකම් ධුරයට අමාත්‍ය රමේෂ් පතිරණය.
අග්‍රාමාත්‍ය දිනේෂ් ගුණවර්ධනගේ සහ ආණ්ඩු පක්ෂයේ ප්‍රධාන සංවිධායක අමාත්‍ය ප්‍රසන්න රණතුංගගේ ප්‍රධානත්වයෙන් පැවති මෙම හමුව සඳහා ජනාධිපති රනිල් වික්‍රමසිංහට සහාය පළ කරන ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රීවරු සියයකට ආසන්න පිරිසක් එක්ව සිටි බවයි වාර්තා වන්නේ.
නව සන්ධානයේ නිලධාරි මණ්ඩලය, විධායක සභාව මෙන්ම ඊට සෙසු පක්ෂ සම්බන්ධ කර ගැනීම පිළිබඳව මෙහිදී දීර්ඝ ලෙස සාකච්ඡා කර තිබෙනවා.
