වලංගු රියැදුරු බලපත්‍රයක් නොමැතිව කාර් රථයක් පැදවීමේ සිද්ධියක් සම්බන්ධයෙන් මීරිගම ප්‍රදේශයේ විහාරස්ථානයක වැඩවාසය කරනු ලබන අවුරුදු 46 ක් වන හිමිනමක අත්අඩංගුවට ගත් බව කුරුණෑගල පොලිසිය පවසයි.
මෙම හිමිනම නුවර සිට කුලියාපිටිය කඳානෙ ගෙදර පොලිස් වසමේ පිහිටි විහාරස්ථානය කරා මෝටර් රථයකින් ගමන් කර තිබේ.
මෙම සිද්ධිය දුටු කුරුණෑගල පොලිසියේ රථවාහන අංශයේ නිලධාරීන් විසින් සිදුකළ පරීක්ෂාවකදී වලංගු රියැදුරු බලපත්‍රයක් නොතිබීම හේතුවෙන් අත්අඩංගුවට ගෙන තිබුණු අතර එම හිමිනමගේ රියැදුරු එදින කිසියම් රාජකාරියක් සදහා යාම හේතුවෙන් එම හිමිනම මෝටර් රථය පදවා ඇති බවට හිමිනම පොලිසියට දන්වා තිබේ.
අත්අඩංගුවට ගත් හිමිනම අධිකරණයට ඉදිරිපත් කිරීමට නියමිතව තිබුණි.
කුරුණෑගල දිසාව බාර ජ්‍යෙෂ්ඨ පොලිස් අධිකාරී උපුල් චන්දනගේ උපදෙස් පරිදි කුරුණෑගල පොලිස් ස්ථානයේ ස්ථානාධිපති ප්‍රධාන පොලිස් පරීක්ෂක කේ.එච්.එම්.ඩී.සී. කොබ්බෑවෙලගේ ප්‍රධානත්වයෙන් වැඩිදුර විමර්ශන සිදුකෙරේ.
